ەسىمدەرىن ارابتارعا ەلىكتەپ قويۋدىڭ قازاقتار ءۇشىن نە قاجەتى بار؟

الماتى. قازاقپارات - جاقىندا قازاقستاندىق جۋرناليست اتى-جوندەرىن ارابتارعا ەلىكتەپ قوياتىن قازاقتاردى اشى سىنعا الدى.

ونىڭ ويىنشا، مۇنداي ەلىكتەۋشىلىككە قۇران ەشكىمدى ۇندەگەن ەمەس.

وتاندىق جۋرناليست جولىمبەت ماكىش ەسىمدەرىن ارابتارعا ەلىكتەپ ايتۋدىڭ نە قاجەتى بار دەپ ءوز Facebook پاراقشاسىندا كوپشىلىككە ساۋال تاستادى.

«شاشتارازداعى كەزەگىمنىڭ الدىندا ءۇش-ءتورت جاستاعى ەكى بالاسىن ەرتكەن قازاقتىڭ كەلىنشەگى وتىر... مەنى كەلىنشەكتىڭ ۇلدارىن قالاي اتاعانى تاڭقالدىردى. تىلدىڭ زاڭدىلىعىن بەلدەن باسىپ، الگى كىشكەنتاي جۇگىرمەكتەردى: « مۋھامماد»، «ابدۋلماليك» دەپ ارابتىڭ ماقامىنا سالىپ شاقىرادى. قۇدايىم-اۋ، دەدىم، بالالارىنا «حالىقارالىق» ەسىمدەردى قوياتىنداردان مىنانىڭ قاي جەرى كەم؟ ەكەۋى دە ۇلتتىعىنان جۇرداي بولعان تاپ- تازا كالكالار عوي! حالقىمىز مۇنداي كىرمە سوزدەردى باياعىدا-اق عاسىرلاردىڭ سۇزگىسىنەن وتكىزىپ، مۇقامەت، ماقامبەت، مامبەت، ابدىمالىك، ابىلمالىك دەپ كەلەدى. ءدىندى ۇستانعانى جاقسى، بىراق اتى- جوندەرىن تۇرپايى تۇردە ارابتارعا ەلىكتەپ ايتۋدىڭ نە قاجەتى بار ەدى؟»، - دەپ اشىندى ول.

جۋرناليستىڭ پىكىرىنشە، مۇنداي ەلىكتەۋشىلىككە قۇران ەشكىمدى ۇندەگەن ەمەس.

«الدە قۇراندا وسىعان ۇندەي ما؟ كەرىسىنشە، وندا: «ءبىر- ءبىرىڭدى تانىپ-بىلۋلەرىڭ ءۇشىن، مەن سەندەردى ۇلت پەن ۇلىسقا ءبولىپ جاراتتىم» دەيدى... مۇنداي ءتىلىن بۇراپ سويلەۋگە اۋەستىكتى «احيلاردىڭ» بارلىعىنان دەرلىك بايقاۋعا بولادى... قازاقتىڭ: «قوي كورمەگەن، قۋالاپ ءجۇرىپ ولتىرەدى» دەگەن ءسوزى وسىندايدا ەسكە تۇسەدى... بۇنىڭ بىردەن- ءبىر سەبەبىن، ءدىني ساباقتاستىقتىڭ ءۇزىلىپ قالعاندىعىمەن بايلانىستىرامىن. مەشىتتەرىمىز قازىر باسقاعا مويىن بۇرا الماي، ناسيحاتپەن عانا اينالىسىپ كەتتى... بۇرىڭعىداي ءدىني ورتا جوق. بولسا دا، ەندى-ەندى قالىپتاسا باستادى... ونىڭ وزىندە، باسەكە مىقتى. ءبىزدىڭ رۋحانياتىمىز قازىر قايتا فورماتتالىپ جاتقان سياقتى... ءبىراق ونىڭ ازىرگە ۇلتقا تۇككە پايداسى تيمەي تۇر. ويتكەنى توز- توزى شىقسا دا، قازاقتىڭ بولمىسى بۇرىنعى كۇپىسىن شەشپەي كەلەدى... ءدال مىنانداي داراقىلىقتىڭ ەمەس، دانالىقتىڭ ءيىسى شىعاتىن سول كۇپىگە ەشتەمە جەتپەيدى ەكەن...»، - دەپ ويىن ءتۇيدى ماكىش.

اۆتور تاعى ءبىر جازباسىندا ەسىمىن قازاقشا دىبىستاۋعا ۇيالاتىنداردى سىناعان.

«ەسىمىن قازاقشا دىبىستاۋعا ۇيالاتىنداردىڭ ءبارى (ءوزىن قور كورەتىن كومپلەكستىڭ) قۇلدىق پسيحولوگيانىڭ جەتەگىندە جۇرگەن ادامدار. ءبىر قىزدىڭ وزىنە عاليا دەگەنگە، «گاليا دەپ ايت، مامبەتتەر قۇساماي!» دەپ جاتقانىن دا كوردىم. مامبەت تە پايعامباردىڭ اتى ەكەنىن بىلسە عوي»، - دەپ كەزەكتى نازىن ءبىلدىردى ول.

 

دەرەككوز: NUR. KZ