سوت جۇمىستان زاڭسىز شىعارىلعان مەكتەپ ديرەكتورىن قايتا ورنالاستىردى

استانا. قازاقپارات - قوستاناي وبلىسىنىڭ دەنيسوۆ اۋداندىق سوتى دەنيسوۆ اۋىلىنداعى ورتا مەكتەپ ديرەكتورىن جۇمىسقا قايتا الۋ، ءماجبۇرلى جۇمىسسىز جۇرگەن مەرزىمدەگى ەڭبەكاقىسىن جانە مورالدىق زالالدى ءوندىرۋ تۋرالى ازاماتتىق ءىستى قارادى.

ازاماتتىق ءىس ماتەريالدارى بويىنشا، ازاماتشا م. 1986 -جىلدان باستاپ مەكتەپ ديرەكتورى بولىپ قىزمەت ىستەگەن. وسى جىلدار ىشىندە وقۋ ورنى تەك اۋداندا عانا ەمەس، وبلىس بويىنشا الدىڭعى قاتارلى ءبىلىم وشاعى رەتىندە تانىلعان. وقۋشىلار ءبىلىم كورسەتكىشى جاعىنان وتە جاقسى جەتىستىكتەرگە قول جەتكىزىپ، بىرنەشە رەت «التىن بەلگى» العان.

مەكتەپ باسشىسىنىڭ اتىنا تۇسكەن العىسحاتتار دا جوق ەمەس. ال بيىلعى 18 -مامىردا «دەنيسوۆ ورتا مەكتەبى»  م م مەملەكەتتىك اتتەستاتسيادان سۇرىنبەي وتكەن.

سوت تالقىلاۋ بارىسىندا تالاپكەر قولدانىستاعى ق ر ەڭبەك كودەكسىنە ساي ءبىر اي مەرزىم بۇرىن جازباشا ەسكەرتۋسىز جۇمىستان شىعارىلعانى انىقتالدى.

ازاماتشا م. -مەن ەڭبەك شارتىن بۇزۋ تۋرالى بۇيرىقتا ق ر ەڭبەك كودەكسىنىڭ 51-بابىنىڭ 2-بولىمىنە سىلتەمە جاسالىپ، ەڭبەك كەلىسىمشارتى ونىڭ مەرزىمىنىڭ وتۋىنە بايلانىستى بۇزىلعاندىعى ناقتىلانادى. الايدا، قۇجاتتا كەلىسىمشارتتىڭ قاشان بەكىتىلگەنى جانە ونىڭ مەرزىمى قاشان اياقتالعانى كورسەتىلمەگەن. جاۋاپكەر مەن تالاپكەر اراسىنداعى ەڭبەك قارىم- قاتىناسى مەرزىمسىز سيپاتقا يە بولدى.

سوت تالاپكەردى جۇمىستان شىعارۋعا نەگىز تاپپاي «دەنيسوۆ ورتا مەكتەبى» م م ديرەكتورى م.  مەن ەڭبەك كەلىسىمشارتىن بۇزۋ تۋرالى «دەنيسوۆ اۋداندىق ءبىلىم ءبولىمى» م م بۇيرىعىن زاڭسىز دەپ تانىپ، كۇشىن جويدى.

سونىمەن قاتار، سوت شەشىمىنە سايكەس تالاپكەر پايداسىنا 72200 تەڭگە كولەمىندە ەڭبەكاقى، 30 مىڭ تەڭگە مورالدىق زالال وتەمى جانە 10 مىڭ تەڭگە سوتتاعى وكىل قىزمەتىنە شىعىن وتەمى ءوندىرىلدى.

جۇمىسقا قايتا ورنالاستىرۋ جانە «دەنيسوۆ اۋداندىق ءبىلىم ءبولىمى» م م- نەن جالاقى ءوندىرۋ تۋرالى شەشىمنىڭ شۇعىل ورىندالۋى تۋرالى قاۋلى شىعارىلدى.

سوت شەشىمى زاڭدى كۇشىنە ەنگەن جوق.