جالعان اقپارات بەرگەن نەمەسە اقپارات بەرۋدەن باس تارتقان باسشى ءوز قالتاسىنان ايىپپۇل تولەيدى

استانا. قازاقپارات - جالعان اقپارات بەرگەن نەمەسە مۇلدە بەرمەگەن مەملەكەتتىك مەكەمەنىڭ ءبىرىنشى باسشىسى ءوز قالتاسىنان ايىپپۇل تولەيدى.

بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە ق ر پارلامەنتى ءماجىلىسىنىڭ دەپۋتاتى ماۋلەن اشىمبايەۆ ايتتى.

«اكىمشىلىك قۇقىق بۇزۋشىلىق تۋرالى» كودەكستە 30 دان 100 ا ە ك- كە دەيىنگى كولەمدە ايىپپۇل قاراستىرىلعان. مەملەكەتتىك ورگاندار تاراپىنان جالعان اقپارات نەمەسە سايكەسىنشە اقپارات بەرىلمەگەن كەزدە مەملەكەتتىك ورگاننىڭ ءوزى ەمەس، ونىڭ لاۋازىمدى تۇلعالارى ايىپپۇل تولەيتىن بولادى. ويتكەنى، مەملەكەتتىك ورگان اقشاسى بيۋدجەت قاراجاتى، حالىقتىڭ قاراجاتى»، - دەدى دەپۋتات.

سونىمەن قاتار م. اشىمبايەۆ اقپاراتقا قولجەتىمدىلىكتىڭ جاڭا زاڭناماسىندا بيزنەس سۋبەكتىلەرىنىڭ جاۋاپكەرشىلىگى قاراستىرىلعانىن اتاپ ءوتتى.

«ەگەر ولار بيۋدەت قاراجاتىن پايدالانۋعا قاتىستى اقپاراتتارعا يە ساناتىنا جاتاتىن بولسا جانە ونى بەرمەيتىن بولسا، وندا ولار دا زاڭعا سايكەس جاۋاپكەرشىلىككە تارتىلادى. بۇل رەتتە ءسوز اتالعان قۇرىلىمداردىڭ، ياعني، زاڭدى تۇلعالاردىڭ جاۋاپكەرشىلى جايىندا بولىپ وتىر»، - دەدى م. اشىمبايەۆ.

تولىقتاي العاندا، ونىڭ ايتۋىنشا، بۇل زاڭ اقپاراتقا قولجەتىمدىلىككە، ءتۇرلى مالىمەتتەر الۋعا مۇمكىندىك بەرەدى.

«بۇعان قوسا، بۇل زاڭ مەملەكەتتىك شىعىستاردى وڭتايلاندىرعا مۇمكىنشلىك بەرەدى دەپ كۇتىپ وتىرمىز. ياعني، بارلىق بيۋدجەتتىك جوبالار، قارجىلىق تۇرعىداعى بارلىق جوبالار تۋرالى اقپاراتتار قوعامعا قولجەتىمدى بولادى»، - دەدى ول.

اۆتور: مارلان جيەمباي