ايەل ءتورت ءتۇرلى بولادى

استانا. قازاقپارات - بىردە قورقىت اتا وعىز قاعانىنىڭ وزىنە تىكەلەي قاراتا ايتىپ، ەل-جۇرتىنا مىناداي وسيەت قالدىرىپتى: «ايەلدىڭ ءوزى ءتورت ءتۇرلى بولادى. ونىڭ ءبىرى نيەتى قۋراعان ايەل، ەكىنشىسى - ىنساپسىز ايەل، ءۇشىنشىسى - ءۇيدىڭ قۇتى بولعان ايەل، ءتورتىنشىسى - كەسىر ايەل. ايەل بىتكەننىڭ ەڭ جامانى - سول.

وتباسىنىڭ قۇتى بولعان ايەل دالادان ءبىر قوناق كەلسە، ۇيىندە ەرى بولماسا دا، وعان سۋسىن بەرىپ، بار ءدامىن الدىنا قويادى، سىيلاپ اتتاندىرىپ سالادى. بۇلار - ايشا مەن فاتيمادان باتا العان ايەلدەر. حان يەم، مۇنداي ايەلدەر مىڭداپ وسسە دە كوپ ەمەس، بالكىم از. ءسىزدىڭ وشاعىڭىزعا سونداي ايەل كەز بولسىن.

ودان سوڭعىسى - ىنساپسىز، قاناعاتسىز ايەل. ونداي ايەل تاڭەرتەڭ توسەگىنەن تۇرىپ، بەتى-قولىن جۋماستان توعىز توقاشتىڭ ءبارىن اۋدارىستىرىپ، ەڭ ءتاۋىرىن تاڭداپ جەيدى، اۋزىن تومپايتادى، ءبىر شەلەك ايراندى باسىنا كوتەرىپ، قارىندى قامپيتادى، سودان سوڭ ماڭدايىن سابالاپ، جىلانا باستايدى دا: «قاراڭ قالعىر، وسى كۇيگە مەن قايدان دۋشار بولدىم. ءبىر كۇن قارنىم تويىپ اس ىشپەدىم، جۇزىمە كۇلكى كەلمەدى، اياعىما ىلگەن باشپاعىم بولمادى، بەتىمنەن پەردە تۇسپەدى. ەرىم ءولىپ باسقا بىرەۋگە تيسەم، باعىم اشىلار ەدى، سول ءۇمىتىم وشپەسىن»، - دەيدى. حان يەم، ونداي ايەل مىڭ بولسا دا، ءوسىپ-ونبەسىن، ءسىزدىڭ وشاعىڭىزعا كەز بولا كورمەسىن.

ودان سوڭعىسىن سالاق ايەل دەيمىز. ونداي ايەل توسەگىنەن تۇرعان سوڭ بەتى-قولىن جۋادى، شاتىردىڭ ول شەتى مەن بۇل شەتىنە قارايدى دا، كۇبىنى اپىل-عۇپىل ءپىسىپ، كورپە-توسەگىن جينايدى. سودان سوڭ «ءشۇۋ!» - دەپ اۋىل كەزىپ، ءتۇس قايتا ۇيىنە ورالادى. كەلسە، ءۇيى ۇرلانعان، قازان-اياعىن ءيت جالاعان، بيە-بۇزاۋ سۇيكەنىپ، قورادا بايلاۋلى قالعان سيىرى موڭىرەيدى. كەلە سالا ايەل كورشىلەرىنە بارىپ، شاپتىعا باستايدى: «اۋ، قىزدار-اۋ، زىليحام، ءزۇبايرام، رۋبايدام، بيكەشتەرىم. ۋا، ازامات تۋعان جىگىت-جەلەڭدەرىم، اينا-مالىك، قۇتلى-مالىك، قايدا ەدىڭدەر؟ ويباي-اۋ، ءۇيىم قۇلاپ قالىپتى، تۇندە قايدا جاتامىز؟ مەنى ەرىگىپ ءجۇر دەدىڭدەر مە؟ ءزارۋ جۇمىس بولعان سوڭ كەتىپ ەدىم عوي. ۇيىمە نەگە كوز قىرىن سالمادىڭدار؟ «كورشى اقىسى - ءتاڭىرى اقىسى» دەگەن قايدا؟» - دەپ بەزەك قاعادى. حان يەم، ونداي ايەل مىڭ بولسا دا ءوسىپ-ونبەسىن، ءسىزدىڭ وشاعىڭىزعا كەز بولماسىن.

ەڭ سوڭعىسى -  ادام ءتىلىن المايتىن كەسىر ايەل. ۇيگە تۇزدەن ءبىر ۇياتتى قوناق كەلىپ، ەرى وعان: «ورنىڭنان تۇرىپ، نان اكەل، جەيىك، قوناعىڭ دا جەسىن»، - دەسە، ايەلى ەرىنە: «ۇيدە پىسكەن نان جوق»، - دەيدى. «بارىڭدى بەر»، - دەسە، ايەلى: «نە ساندالىپ وتىرسىڭ، ءۇيىڭنىڭ الدەقاشان قۋ مولاعا اينالعانىن بىلمەيمىسىڭ؟ ۇيدە ۇن جوق، ديىرمەنگە كەتكەن تۇيە قايتقان جوق، ونىڭ نە اكەلەرى دە بەلگىسىز. داستارحانىمدى جەمەسە، وزگە بەرەرىم جوق»، - دەپ بارماعىن كورسەتەدى، ەرىنە سىرتىن بەرىپ، داستارحاندى كىسى الدىنا لاقتىرىپ تاستايدى. ونداي ايەلگە مىڭ ءسوز ايتساڭ، سونىڭ بارىنە دە جاۋاپ قاتادى، ءبىراق ەرىنىڭ ايتقانىن قۇلاققا ىلمەيدى. ونداي ايەلدى نۇح پايعامباردىڭ كوز جاسىنان پايدا بولعاندار دەيمىز. حان يەم، ءسىزدى اللا وسىنداي ايەلدەردەن ساقتاسىن، ونداي ايەل ءسىزدىڭ وشاعىڭىزعا كەز بولماسىن».

Alashainasy.kz