ەلوردادا «اۋىل» پارتياسى جاس اقىن-جازۋشىلاردىڭ باسىن قوستى
شاراعا قالىڭ وقىرمانعا شىعارمالارىمەن تانىلىپ ۇلگەرگەن جازۋشىلار بەن ءماندى دە وتكىر ولەڭدەرىمەن كوزگە تۇسكەن اقىندار قاتىستى. ولار جاس تا بولسا، قوعامداعى قۇبىلىستارعا ءۇن قاتىپ، وزىندىك قولتاڭباسىمەن ەرەكشەلەنگەن شىعارماشىلىق يەلەرى.
«اۋىل» پارتياسىنىڭ ءتوراعاسى قالامگەرلەرگە جاڭالانعان پارتيانىڭ باسىمدىقتى باعىتتارىن تانىستىرا كەلە، ۇيىمنىڭ نەگىزگى قۇندىلىقتارى - ەركىندىك، وتان سۇيگىشتىك، ادىلدىك پەن تەڭدىك جانە ىنتىماقتاستىق ەكەنىن ايتتى. تۇرعىندارى جوعارى دەڭگەيدە ءومىر سۇرەتىن تاۋەلسىز مىقتى، وركەندەگەن قازاقستاندى قۇرۋ - پارتيا ماقساتى.
«قالامگەرلەر قوعام دامۋىنىڭ تامىرشىسى. قوعامنىڭ قيىس كەتكەن جەرلەرىن ءدوپ باسىپ، قاتەلىكتەردى وتكىر سوزدەرىمەن تۇيرەپ وتىرار اقىن جازۋشىلاردىڭ ەڭبەگى پارتيا جۇمىسىمەن ساباقتاس»، - دەپ اتاپ ءوتتى «اۋىل» پارتياسىنىڭ ءتوراعاسى ءا. بەكتايەۆ.
كەزدەسۋ بەيرەسمي فورماتتا ءوتىپ، ەمىن-ەركىن اڭگىمە ءوربىدى.
«قازىرگى كەزەڭ جاھاندانۋ ءداۋىرى مەملەكەتتەردىڭ، حالىقتار مەن ۇلتتاردىڭ الدىنا جاڭا مۇمكىندىكتەر اشىپ قانا قويماي، جاڭا سىناقتار مەن جاڭا تالاپتارىن الا كەلدى» - دەدى پارتيا باسشىسى ءا. بەكتايەۆ.
جەكەلەگەن مەملەكەتتەر عانا ەمەس، تۇتاس وركەنيەتتەر الدىندا تاڭداۋ ءساتى تۇر. بۇل تاڭداۋ جولى - ءوزىڭنىڭ ۇلتتىق، مادەني-رۋحاني بەت-بەينەڭدى، سالت-ءداستۇرىڭدى جوعالتپاي، ءتىلىڭ مەن ءدىلىڭدى، ءدىنىڭدى ساقتاي وتىرىپ، جاھاندانۋدىڭ سارا جولىنا ءتۇسۋ. ءارى وزگەرىسكە، جاڭالىققا، تەحنولوگياعا اشىق بولۋ، نوۋ- حاۋعا بەت بۇرۋ اسا قاجەت.
پارتيا ءتوراعاسىنىڭ بۇل ويىن قالامگەرلەر دە جالعاستىردى. وسى رەتتە جاس قالامگەرلەر جاھاندانۋ پروتسەسىنەن تىس قالماعان، سويتە تۇرا قازاقتىڭ قايماعى بۇزىلماعان اۋىلدارىن سۋرەتتەۋ، ۇلتتىق قۇندىلىقتارىن دارىپتەۋ، ونى بارىنشا تارتىمدى ەتىپ وقىرمانعا ۇسىنۋ الداعى ماڭىزدى جوسپارلارىنىڭ ءبىرى ەكەنىن جەتكىزدى.
پارتيا ءتوراعاسى ءا. بەكتايەۆتىڭ پايىمداۋىنشا، الەۋمەتتىك ەتيكا ءدال وسى اۋىلدا قالىپتاسادى. بۇگىندە بۇكىل الەم ادامگەرشىلىك قۇندىلىقتار داعدارىسىن باستان كەشىرۋدە. سەنىم سەتىنەگەن، مەيىرىم جوعالعان. بۇل سوزدەردىڭ ءمان ماعىناسىن، ماڭىزىن كوبىمىز ءالى تۇسىنبەي كەلەمىز. ءبىراق ەكونوميكانىڭ ءوزى ادامي قۇندىلىقتاردان تۋىندايدى. ال التىن بەسىك اۋىلىمىز قوعامعا اسا قاجەتتى وسى قۇندىلىقتاردىڭ قازانى. سوندىقتان، اۋىل مەن قازاق ۇعىمىنىڭ ەشقاشان اجىراماعانى كەرەك. پارتيانىڭ ەڭ باستى ماقساتى دا وسى. اۋىلدى كوشتەن قالدىرماي، دامىتا وتىرىپ، ۇلتتىق قۇندىلىقتاردى ساقتاپ قالۋ.
وتىرىس بارىسىندا پارتيا ءتوراعاسى ءا. بەكتايەۆ اۋىل تىنىس- تىرشىلىگى، تىلسىم دۇنيەسى جونىندە پوۆەستتەر مەن پوەمالارعا جاس اقىندار اراسىندا «اۋىل» پارتياسى كونكۋرس جاريالايتىندىعىن جەتكىزدى.
كونكۋرس ەرەجەلەرىن «اۋىل» پارتياسىنىڭ ورتالىق اپپاراتى دايىنداپ، بۇقارالىق اقپارات قۇرالدارىندا جاقىن ارادا جاريالايتىن بولادى.
سونىمەن بىرگە، پارتيا اياسىندا جاس اقىن، جازۋشىلاردىڭ باسىن بىرىكتىرىپ، بۇگىنگى زاماننىڭ رۋحاني ماسەلەلەرىن، ءداستۇرلى مادەنيەتىن دامىتۋ ماسەلەلەرىن ساراپتاپ، دامۋدىڭ جاڭا جولىن قاراستىراتىن كلۋب قۇرۋ ۇسىنىلدى.
