استانانىڭ ەڭ ۇزدىك وقۋشىسى انىقتالدى

استانا. قازاقپارات - ەلوردادا ق ر تۇڭعىش پرەزيدەنتى كۇنىن مەرەكەلەۋ اياسىندا «ەلوردالىق ءبىلىم بەرۋ مەكەمەلەرىنىڭ كوشباسشى وقۋشىسى» زياتكەرلىك بايقاۋى ءوتتى.

شارانى ۇيىمداستىرۋشى - استانا قالاسى ءبىلىم باسقارماسىنىڭ «استانا دارىنى» وڭىرلىك عىلىمي پراكتيكالىق ورتالىعى دەپ حابارلايدى ەلوردا اكىمىنىڭ رەسمي سايتى.

بيىل بايقاۋ تاقىرىبى قانىش ساتپايەۆ، ەۆنەي بوكەتوۆ، ءالىمحان ەرمەكوۆ سىندى قازاقستاننىڭ بەلگىلى عالىمدارىنا، حالقىمىزدىڭ پاتريوتتارىنا، قازاق، ورىس جانە الەمدىك مادەنيەت بىلگىرلەرىنە ارنالدى. بايقاۋعا جالپى ءبىلىم بەرەتىن مەكتەپتەردىڭ 10-سىنىپ وقۋشىلارى قاتىستى.

ءۇش كەزەڭنەن تۇرعان اقتىق سىنعا 16 ادام ءوتتى. ولار جالپى ەرۋديتسيا(ءبىلىم دەڭگەيى) بويىنشا سۇراقتارعا جاۋاپ بەرىپ، «قازاقستان عالىمدارى: ق. ساتپايەۆ، ە. بوكەتوۆ، ءا. ەرمەكوۆ» ۆيكتوريناسىنا قاتىستى، سونداي- اق بەرىلگەن تاقىرىپتارعا ءماتىن دايىندادى.

بايقاۋ قورىتىندىسى بويىنشا كوشباسشىلار اراسىندا № 60-ليتسەيدىڭ وقۋشىسى ايسۇلۋ اسىلبەكوۆا جەڭىمپاز اتاندى.

«مەنىڭشە بۇل بايقاۋ ءوزىڭنىڭ كوشباسشىلىق قاسيەتتەرىڭدى كورسەتۋگە، ءبىلىم الۋعا زور مۇمكىندىك بەرەدى، بۇل بايقاۋ پاتريوتيزم سەزىمىن دامىتۋعا سەپتىگىن تيگىزەدى، ال بۇل وتە ماڭىزدى. ماعان كومەكتەسىپ، كەڭەستەرىن بەرگەن بارلىق مەكتەپ ۇستازدارىنا العىسىمدى بىلدىرەمىن»، - دەيدى ا. اسىلبەكوۆا.

ءبىرىنشى ورىن № 40 -مەكتەپ وقۋشىسى ەمانعالييەۆا كاميلاعا بۇيىرسا، № 52 -ورتا مەكتەپ وقۋشىسى بازارحان دامير مەن № 64 -مەكتەپ-ليتسەي وقۋشىسى ابىلبەكوۆا ادال 2-ورىن الدى. № 62 -مەكتەپ- ليتسەيدىڭ وقۋشىسى تۇرسۇنقانوۆا انەل، № 66 -مەكتەپ-ليتسەيدىڭ وقۋشىسى قۇرامىسوۆا اقنيەت جانە № 38 -مەكتەپ- ليتسەيدىڭ وقۋشىسى دوسبولوۆ دياسجان 3-ورىندى يەلەندى.

بايقاۋ جەڭىمپازى مەن جۇلدەگەرلەر ديپلومدارمەن، گراموتالارمەن جانە باعالى سىيلىقتارمەن ماراپاتتالدى.