جۇمىسپەن قامتۋعا بولىنگەن بيۋدجەت قاراجاتىن پايدالانۋدا كوپتەگەن بۇزۋشىلىقتار بار - د. نازاربايەۆا

استانا. قازاقپارات - حالىقتى جۇمىسپەن قامتۋ ماسەلەلەرىن شەشۋ جەرگىلىكتى اتقارۋشى ورگانداردىڭ كۇن تارتىبىندە ءبىرىنشى ورىندا تۇرۋى ءتيىس، دەپ مالىمدەدى ق ر ۇكىمەتىنىڭ سەلەكتورلىق وتىرىسىندا ۆيتسە- پرەمەر داريعا نازاربايەۆا.

بۇل تۋرالى primeminister.kz حابارلايدى.

«حالىقتى جۇمىسپەن قامتۋ ماسەلەسىنە باسا نازار اۋدارۋ قاجەت، ول قازىرگى ەكونوميكالىق جاعدايدا قىسىمعا تاپ بولادى. سوندىقتان بۇل ورايدا مەملەكەتتىك ورگاندار مەن جەرگىلىكتى اتقارۋشى ورگانداردىڭ بىرلەسىپ، ۇيىمداسقان ناقتى قىزمەتى قاجەت»، - دەدى د. نازاربايەۆا.

د. نازاربايەۆانىڭ ايتۋىنشا، قازاقستان وڭىرلەرىندە داعدارىسقا قارسى شتابتار جانە ءۇش جاقتى كوميسسيالار بار، ولار اتالعان ماسەلە بويىنشا ناقتى جۇمىس جاساۋلارى اسا ماڭىزدى.

ۆيتسە-پرەمەر وڭىرلەردە جۇمىسپەن قامتۋدىڭ جول كارتاسىن جۇزەگە اسىرۋعا بولىنگەن بيۋدجەت قاراجاتىن پايدالانۋداعى كوپتەگەن بۇزۋشىلىقتار ماسەلەسىن كوتەردى.

«باس پروكۋراتۋرا مالىمەتىنشە، ءتارتىپ بۇزۋشىلىق كوبەيگەنى انىقتالدى. بۇل ۇرلىق- قارلىق ماسەلەسى، دەمەك جەرگىلىكتى ورگان قىزمەتكەرلەرى جۇمىستى تىڭعىلىقتى ءبىتىرىپ وتىرعان جوق. سوندىقتان، جەرگىلىكتى اتقارۋشى ورگاندار جاۋاپكەرشىلىكتى مەملەكەتتىك ورگاندارعا جۇكتەپ وتىرۋلارى ءتيىس. وبلىستاردا 7 مەملەكەتتىك باعدارلاما جۇزەگە اسىرىلۋدا، ول جوبالارعا باعىتتالاتىن قارجى دا جەرگىلىكتى اتقارۋشى ورگان قۇزىرىندا»، - دەپ تۇيىندەدى د. نازاربايەۆا ق ر پرەمەر-ءمينيسترى ك. ماسىموۆكە قاراتا سويلەگەن سوزىندە.