الماتى جاستارى ەلباسىمەن تۇسكەن ەرەكشە فوتوسۋرەتتەرىن مەتروداعى كورمەگە شىعاردى - فوتو

الماتى. قازاقپارات - الماتى مەتروسىندا ەلباسىنىڭ بىرەگەي فوتوسۋرەتتەرىنىڭ كورمەسى اشىلدى. مادەني شارانى «نۇر وتان» پارتياسى «جاس وتان» جاستار قاناتىنىڭ الماتى فيليالى، ق ر پرەزيدەنتىنىڭ مۇراعاتى، قالالىق ىشكى ساياسات باسقارماسى ۇيىمداستىردى.

 «بايقوڭىر» ستانساسىندا وتكەن كورمەگە 1 -جەلتوقسان تۇڭعىش پرەزيدەنت كۇنىنە وراي، ەلباسى ن. نازاربايەۆتىڭ ءار ايماق جاستارىمەن كەزدەسۋلەرىندەگى سۋرەتتەرى قويىلدى. پرەزيدەنتتىڭ جەكە فوتوگرافىنىڭ سۋرەتتەرىنەن بولەك، باسقا دا كاسىبي فوتوگرافتاردىڭ دا جۇمىستارى ۇسىنىلدى.

«ەلباسىنىڭ ءار جىلدارى جاستارمەن تۇسكەن ەرەكشە فوتوسۋرەتتەرىنەن قۇرالعان كورمەنى ۇيىمداستىرىپ وتىرمىز. بۇل شارا جاستارعا وتانسۇيگىشتىكتى ۇيرەتۋ، جاستاردىڭ بويىندا پاتريوتيزمدى قالىپتاستىرۋعا باعىتتالعان. جاستاردىڭ قوعامداعى بەلسەندىلىگى اسا جوعارى. ولار ءتۇرلى سالادا قىزمەت ەتىپ جاتىر. «بولاشاق» باعدارلاماسى بويىنشا الەمدىك جوو- دا وقىپ جاتقاندار بار. بۇنىڭ ءبارى پرەزيدەنت نۇرسۇلتان نازاربايەۆپەن تىكەلەي بايلانىستى»، - دەدى «جاس وتان» جاستار قاناتىنىڭ الماتىداعى فيليالىنىڭ باسشىسى ارمان قالىبەكوۆ.

كورمە 10 -جەلتوقسانعا دەيىن جالعاسادى.

اۆتور: گۇلميرا عوسمان-ءالي