گۋاڭجوۋدە جول اپاتىنان زارداپ شەككەن ستۋدەنت استانا قالاسىنىڭ تۋماسى بولىپ شىقتى
«ول ساباقتى جاقسى وقيدى. ديپلوم جۇمىسىن جازعانبىز. الدىن الا قورعاۋ ءوتۋى ءتيىس بولاتىن. وقيعا 22 -قاراشادا ساعات كەشكى ۋاقىتتا 19.30 دا ورىن الدى. قازىر ساقتاندىرۋ ماسەلەسىن شەشىپ جاتىرمىز، بىزگە وتەماقى تولەنبەيتىنىن، ەرلاننىڭ ءوزى كىنالى ەكەنىن ايتۋدا. مەديتسينالىق شىعىستاردىڭ تىم بولماسا جارتىسىن تولەسە دەپ كەلىسسوز جۇرگىزىپ جاتىرمىز. بىزگە مۇنى شەشۋگە ق ح ر- داعى ق ر ەلشىلىگىنىڭ قىزمەتكەرلەرى كومەكتەسۋدە»، - دەدى قازاقپارات تىلشىسىنە، زارداپ شەككەن جىگىتتىڭ دوسى ا. راحاديلوۆ.
ونىڭ ايتۋىنشا، ەرلانمەن بىرگە كەلە جاتقان نارگيز شاندوزوۆانىڭ دەنەسىندە ءبىرقاتار جاراقاتتار بار.
زارداپ شەككەن بويجەتكەننىڭ قۇربىسى ءاليا ايتقۇلوۆا وقيعا ورىن العان كۇنى ەرلان مەن نارگيزدىڭ ىزىمەن كەلە جاتقان ەكەن، ول قازىر ەرلان ەس- ءتۇسسىز جاتقانىن، اشىق مي جاراقاتىن العانىن مالىمدەدى.
«دارىگەرلەر ونىڭ ەسىن جيعانىن كۇتىپ وتىر. ونى جاقسىراق اۋرۋحاناعا جەتكىزۋ ويلاستىرىلۋدا» - دەدى ول.
ايتقۇلوۆا ەرلان موتوتسيكلدى دوسىنان العانىن حابارلادى. ءبىر- ەكى كۇندە قالاعا ستۋدەنتتىڭ اكەسى كەلمەكشى ەكەن.
