وڭدەۋشى ونەركاسىپ سەكتورىندا شەتەلدىك ينۆەستيتسيالار تارتۋ دەڭگەيى بىلتىرعى مەجەدە ساقتالىپ وتىر
بۇگىن ۇكىمەت وتىرىسىندا «نۇرلى جول» باعدارلاماسىنىڭ جۇزەگە اسۋى بويىنشا بايانداما جاساعان ينۆەستيتسيالار جانە دامۋ ءمينيسترى اسەت يسەكەشيەۆ وسىلاي ءمالىم ەتتى.
مينيستر بايانداما بارىسىندا مەملەكەت باسشىسىنىڭ وتكەن جىلدار ىشىندە ەلىمىزگە ينۆەستيتسيالار تارتۋعا ەرەكشە نازار اۋدارىپ كەلگەنىن جەتكىزدى.
ناتيجەسىندە ءبىرقاتار وڭ كورسەتكىشتەرگە قول جەتتى: 2014-جىلى قازاقستان الەمدەگى تىكەلەي شەتەلدىك ينۆەستيتسيالار تارتىلاتىن ت و پ-30 ەلدەر قاتارىنا ەنسە، ترانزيتتىك ەكونوميكا ەلدەرى اراسىندا وسى كورسەتكىشتە 2- ورىن، تەڭىزگە اشىق جولى جوق ەلدەر اراسىندا 1- ورىنعا كوتەرىلگەن. سونىمەن قاتار، وڭدەۋشى ونەركاسىپ سەكتورىنا تىكەلەي شەتەلدىك ينۆەستيتسيالار اعىنى بىلتىرعى جىلى بۇعان دەيىنگى جىلدارمەن سالىستىرعاندا 2 ەسەگە ارتقان.
«اعىمداعى جىلدىڭ ءبىرىنشى جارتىجىلدىعىندا تىكەلەي شەتەلدىك ينۆەستيتسيالاردىڭ تومەندەۋى، ولاردىڭ دامۋشى ەلدەردەن دامىعان ەلدەر نارىقتارىنا قاراي كەتۋى ورىن الىپ وتىر. ارينە، بۇل قازاقستانعا دا اسەر ەتتى. ماسەلەن، تاۋ-كەن ءوندىرىسى سەكتورىندا تىكەلەي شەتەلدىك ينۆەستيتسيالار 40 پايىزعا، ساۋدا سالاسىنا 38 پايىزعا تومەندەدى. گەولوگيالىق بارلاۋ سەكتورىنا دا 30 پايىزعا ازايدى. ال وڭدەۋشى ونەركاسىپ سەكتورى بىلتىرعى جىلدىڭ دەڭگەيىندە ساقتالىپ وتىر. بۇل بەلگىلى ءبىر مىعىمدىقتى بىلدىرەدى»، - دەدى ءا. يسەكەشيەۆ.
ءمينيستردىڭ ايتۋىنشا، قازىرگى تاڭدا ينۆەستيتسيالار تارتۋ ماسەلەسى كەشەندى تۇردە زەردەلەنىپ، بۇل باعىتتا ەكونوميكالىق دامۋ جانە ىنتىماقتاستىق ۇيىمى ەلدەرىمەن تىعىز جۇمىستار اتقارىلعان. اتالعان ۇيىم مەملەكەتتەرى كەدەرگىلەردى جويۋ بويىنشا 12 ۇسىنىس جاساعان. وسىعان وراي، ءتۇرلى ۆەدومستۆوالار تاراپىنان زاڭنامالىق اكتىلەر قابىلدانىپ، شەتەلدىك جۇمىس كۇشىن تارتۋ ۇدەرىستەرى قايتا قارالعان.
