قىتايدان قالاپ العان ارلي چونتەي تاعى دا ءۇمىتتى اقتامادى

استانا. قازاقپارات - كەشە حيۋستوندا اۋىر اتلەتيكادان ەكى سالماق دارەجەسىندە (بىرەۋى ەرلەر اراسىندا جانە بىرەۋى ايەلدەر اراسىندا) الەم چەمپيوناتى باستالدى.

اۋىر اتلەتيكا فەدەراتسياسىنىڭ باسپا ءسوز قىزمەتىنىڭ حابارلاۋىنشا، جارىستىڭ ءبىرىنشى كۇنى ءبىزدىڭ قۇرامامىز ءۇشىن ءساتسىز ءوتتى.

56 كەلىگە دەيىنگى سالماق دارەجەسىندە قازاقستاننىڭ اتىنان ارلي چونتەي شىقتى. ءبىراق، سپورتشىمىزدىڭ «جۇلقا كوتەرۋدى» ەكىنشى ورىندا اياقتاعانىنا قاراماستان، قوسسايىس قورىتىندىلارى بويىنشا جۇلدەگەرلەر ۇشتىگىنەن شىعىپ كەتتى.

«ا» توبىندا مەدالدار ءۇشىن كۇرەسكە 10 ادام شىقتى.

چونتەي ءبىرىنشى مۇمكىندىگىندە 120 كەلىگە تاپسىرىس بەرىپ، كەيىننەن باستاپقى سالماقتى 127 كەلىگە دەيىن ەكى رەت وزگەرتتى جانە ونى وڭاي ەڭسەردى. ەكىنشى «جۇلقا كوتەرۋى» ءساتسىز ءوتتى، ال ءۇشىنشى مۇمكىندىگىندە ءبىزدىڭ سپورتشىمىز 132 كەلىنى باعىندىردى. ۆەتنام جانە ك ح د ر- دان كەلگەن ەكى قارسىلاسىنا سايكەسىنشە ەكى جانە ءبىر ۇپاي جەتىسپەدى. ەكەۋى دە مالىمدەگەن 133 كەلى سالماقتى باعىندىرا المادى، سوندىقتان بۇل جاتتىعۋدا ءبىزدىڭ سپورتشىمىزدىڭ «كۇمىس» الۋى ايقىن بولدى. ءبىرىنشى ورىندا ولمپيادا ويىندارىنىڭ جەڭىمپازى، «سەرپە كوتەرۋدە» 139 كەلىنى باعىندىرىپ، جاڭا الەمدىك رەكورد ورناتقان قىتايلىق سپورتشى ۋ تسزينبياو ورنالاستى. كوشباسشىلار ۇشتىگىنە 2012-جىلعى وليمپيادا چەمپيونى، 2014-جىلعى الەم چەمپيونى وم يۋن چحول كىردى.

«سەرپە كوتەرۋدە» ءبىزدىڭ سپورتشىمىز 150 كەلىگە تاپسىرىس بەردى، ءبىراق بەرىلگەن ءۇش مۇمكىندىكتىڭ ءبارىن ساتسىزدىكپەن اياقتادى. بۇل جاتتىعۋدا 171 كەلىنى باعىندىرىپ، الەمدىك رەكورد ورناتقان سولتۇستىك كورەيالىق سپورتشى كوشباسشى اتاندى. ول حيۋستون چەمپيوناتىنىڭ التىن مەدالىن الدى.

بۇگىن، 23- قاراشا كۇنى استانا ۋاقىتىمەن ساعات ساعات 03:00 دە 53 كەلىگە دەيىنگى ساناتتا («ا» توبى) مارگاريتا ەليسەيەۆا شىعادى. تىكەلەي كورسەتىلىم «Kazsport» تەلەارناسىندا وتكىزىلەدى.