قىتايدا قازاقتىڭ ۇلتتىق بيلەرى مەكتەپ باعدارلاماسىنا ەنگىزىلدى

استانا. قازاقپارات - قىتايداعى قازاق مەكتەپتەرى «قارا جورعا» مەن «قاماجايدى» رەسمي تۇردە وقۋ باعدارلاماسىنا قوستى. ياعني وقۋشىلار كۇندەلىكتى ورىنداۋعا مىندەتتى جاتتىعۋ ورنىنا، ەندى ۇلتتىق ءبي قيمىلدارىن جاسايدى.

بۇل باستاماعا جەرگىلىكتى بيلىك تاراپىنان دا ەشقانداي قارسىلىق بولماعان. قايتا، ونى بىردەن قولداپ، مىندەتتى وقۋ جۇيەسىنە بەكىتىپ بەردى.

بۇل - كەزەكتى فلەشموب ەمەس، قىتايداعى قازاق مەكتەپتەرىندە جاسالاتىن كۇندەلىكتى جاتتىعۋ. ءبىراق بۇنى توي تومالاقتا بيلەيتىن «قارا جورعا» نەمەسە «قاماجايمەن» شاتاستىرۋعا بولمايدى. ءسوزى، ءانى، ءتىپتى قيمىلىنا دەيىن وقۋشىلارعا بەيىمدەلىپ جاسالعان. ونى مەكتەپ ۇجىمى وسىلاي كۇنىنە 25 مينۋتتىق ۇلكەن ۇزىلىستە ورىندايدى.

«قاراجورعا» ءبيى قىتايداعى قازاق مەكتەپتەرى باعدارلاماسىنداعى ەرەكشەلىكتەردىڭ ءبىرى عانا. وقۋ ورداسىمەن جاقىن تانىسا كەلە تاعى بىرنەشە قىزىقتى جايتقا جولىقتىق. ماسەلەن، قىزدار جاتاقحاناسى. ونىڭ قابىرعاسىندا «قىزعا 40 تىيىم» دەگەن ناقىل سوزدەر جيىنتىعى بار. بۇل - تەك ناقىل سوزدەر ەمەس، ەرەجە مەن تالاپ. ياعني ونى ساقتاماعاندار قاتاڭ ەسكەرتۋ الادى، ءتىپتى وقۋدان شىعارىلادى.

«قىزدار - بولاشاق انالار. سوندىقتان وسىنداي جان- جاقتى، سىمباتتىلىق، ادامگەرشىلىك، مىنەز- قۇلىق جاعىندا ءمىن بولماۋى ءتيىس. بالالاردى وسى تالاپقا ءتۇستى مە، تۇسپەدى مە دەپ اي سوڭىندا، ماۋسىم سوڭىندا باعالاپ وتىرامىز»، - دەيدى №1 قازاق ورتا مەكتەبىنىڭ ديرەكتورى جانار ءيمانالى قىزى.

ءبىر ەرەكشەلىگى قىتايداعى قازاق مەكتەپتەرىندە كۇنىنە 8 ساباق بولادى. 8-ساباق - ۇلتتىق ونەرگە باۋلۋ ءپانى. ياعني وقۋشىلار قولونەر، كەستە تىگۋ، اسپاپ جاساۋدىڭ قىر- سىرىن ۇيرەنەدى. بۇل - كەيىنگى كەزدە وقۋ باعدارلاماسىنا ەنگىزىلگەن جاڭالىقتاردىڭ تاعى ءبىرى.

 ال نەگىزگى ساباقتار قازاق جانە قىتاي تىلىندە جۇرەدى. بۇعان قوسا اعىلشىن ءپانى قوسا وقىتىلادى. ءبىز باس سۇققان قۇلجا قالاسىنداعى قازاق مەكتەبىنىڭ سەكسەن جىلدىق تاريحى بار. دەگەنمەن وقۋ ورداسىنىڭ قازاقستانداعى ءبىلىم وشاقتارىمەن ءالى كۇنگە دەيىن ەش بايلانىس ورناتپاعان. ءبىراق ەلىمىزدىڭ ءبىلىم- عىلىم جۇيەسىمەن تانىسىپ، ەكىجاقتى تاجىريبە الماسۋعا نيەتتى ەكەندىگىن جەتكىزدى.

 nur.kz