قازاقستاندا جول اپاتىنا مىنا كولىكتەر ءجيى ۇشىرايدى
زەرتتەۋ ناتيجەلەرىنە سايكەس، جول اپاتىنا كىنالى ادامداردىڭ 24,6 پايىزى شىقانىنا 5-7 جىل بولعان اۆتوكولىكتى تىزگىندەگەن. 15 پايىزى - 1993-1998-جىلعى اۆتوكولىكتەر.
2014-جىلدىڭ قاڭتارىنان بەرى جول اپاتىنا Toyota ماركاسىنىڭ Camry, Corrolla, Prado, Land Cruiser مودەلدەرىنىڭ يەلەرى ءجيى تۇسكەن. جاپونداردىڭ بۇل برەندىنىڭ ۇلەسىندە بارلىق وقيعانىڭ 19,6 پايىزى بار. ەكىنشى ورىندا «ۆاز» ماركاسى تۇر - 12,4 پايىز. ودان كەيىنگى ورىنداردا Audi, Mazda, Mitsubishi. ەڭ سوڭعى ورىندا - Mercedes. نەمىس ماركاسىنىڭ ۇلەسىندە جول اپاتتارىنىڭ 8 پايىزى بار.
سونىمەن قاتار، زەرتتەۋ ناتيجەلەرىنە سەنسەك، جول اپاتتارىنىڭ 59 پايىزى ەر ادامداردىڭ كىناسىنەن بولادى، ال 41 پايىزى - ايەلدەردىڭ، الايدا ايتا كەتەيىك، ەلىمىزدە جۇرگىزۋشى ايەلدەرگە قاراعاندا ەر ادامدار كوپ. جول-كولىك وقيعالارىنىڭ 33 پايىزىندا 24-33 جاس ارالىعىنداعى ەر ادامدار كىنالى بولادى.
ساراپشىلاردىڭ تۇجىرىمداۋىنشا، بۇل جاستاعى ادامداردا كولىك جۇرگىزۋ تاجىريبەسى اسا كوپ بولمايدى جانە ولار جول قوزعالىسى ەرەجەسىن بۇزىپ، وزدەرىنە جولدا «ۇشىپ جۇرۋگە» ەرىك بەرەدى. سونىمەن قاتار، بۇل توپتاعى ادامداردىڭ كىناسىنەن بولعان جول اپاتتارىنداعى شىعىننىڭ كولەمى ورتاشا تولەمنەن اسىپ تۇسەدى.
جول اپاتىنا سەبەپكەر بولاتىنداردىڭ ەكىنشى ورنىندا 44-53 جاس ارالىعىنداعى جۇرگىزۋشىلەر تۇر، ولاردىڭ ۇلەسى 21 پايىزعا تەڭ. 16 پايىزى - 24 جاسقا دەيىنگىلەر، 11 پايىزى - 34-43 جاس ارالىعىنداعىلار، 7 پايىزى - 51-63 جاستاعىلار.
