تاعى ءبىر بوكىسشى گولوۆكينمەن جۇدىرىقتاسۋعا دايىن ەكەنىن ايتتى

استانا. قازاقپارات - 25 جاستاعى مەكسيكاندىق بوكسشى ساۋل «كانەلو» الۆارەس (46-1-1, 32 ك و) 21 -قاراشادا پۋەرتوريكالىق 34 جاستاعى ميگەل كوتتونى (40-5,33 ك و) جەڭگەننەن كەيىن، ەشكىمنەن قورىقپايتىنىن جانە قازاقستاندىق بوكسشى گەننادي گولوۆكينمەن شىعۋعا دايىن ەكەندىگىن ءمالىم ەتتى.

«مەن ەشكىمنەن قورىقپايمىن. ەگەر سىزدەر گەننادي گولوۆكينمەن شىعۋدى قالاساڭدار، مەن ونىمەن تاپ قازىر جۇدىرىقتاسۋعا دايىنمىن»، - دەدى ول رينگتە الىنعان سۇحبات بارىسىندا.

ايتا كەتۋ كەرەك، ساۋل الۆارەس ميگەل كوتتودان ورتا سالماقتاعى WBC تيتۋلىن تارتىپ الدى. WBC ەرەجەسى بويىنشا ساۋل الۆارەس 15 كۇننىڭ ىشىندە ورتا سالماقتاعى كوشباسشى گەننادي گولوۆكينمەن جۇدىرىقتاسۋعا قاتىستى كەلىسسوزدەردى باستاۋى قاجەت. بۇل مىندەتتى ورىنداماسا، WBC ۇيىمى تيتۋلدى تارتىپ الىپ، قازاقستاندىق بوكسشىعا بەرەدى.