ساۋد ارابياسىندا اقىن ءولىم جازاسىنا كەسىلدى

استانا. قازاقپارات - ساۋد ارابياسىنىڭ سوتى يسلام ءدىنىن ساتتى دەپ، ءارتىس ءارى اقىن اشراف فايادتى ءولىم جازاسىنا كەستى.

بۇل تۋرالى BBC حابارلايدى.

پالەستيندىك اقىن دىنىنەن باس تارتقانى ءۇشىن باسى كەسىلۋى ءتيىس دەگەن سوت قۇجاتى Human Rights Watch قۇقىق قورعاۋشىلارىنىڭ قاراۋىنا ءوتتى. اشراف فايادتى 2013 -جىلى ساۋد ارابياسىنىڭ وڭتۇستىك- باتىسىندا ەلدىڭ ءدىن پوليتسياسى تۇتقىنداعان. 2014 -جىلدىڭ باسىندا سوت ونى 4 جىلعا باس بوستاندىعىنان ايىرىپ، 800 دۇرە ۇرۋ جازاسىنا كەسكەن ەدى. فايادتىڭ ءوزى بولسا، جابىلعان ايىپتىڭ بىردە- بىرەۋىمەن كەلىسپەگەن. ول ءوزىن شىن مۇسىلمانمىن دەپ سانايدى.

ونى تۇرعىنداردىڭ ءبىرى اللا مەن پايعامبار اتىنا كىر كەلتىردى دەپ ايىپتاعان بولاتىن. سونداي-اق كۋاگەر 35 جاستاعى اقىننىڭ ولەڭدەرىندە اتەيستىك يدەيا جاتىر دەپ ايىپتاعان ەكەن. بۇعان سەنگەن ەل سوتى اقىندى ءولىم جازاسىنا كەسىپ وتىر، دەپ جازادى 24.kz.