الماتىدا ىنتىماقتاستىق فورۋمىندا قىسقى ۋنيۆەرسياداعا ازىرلىك ماسەلەلەرى تالقىلاندى - فوتو
وعان الماتى قالاسىنىڭ اكىمى باۋىرجان بايبەك، جەرگىلىكتى مەملەكەتتىك ورگانداردىڭ باسشىلارى، ۋنيۆەرسيادانى ۇيىمداستىرۋ كوميتەتىنىڭ وكىلدەرى، سونىمەن قاتار ءتۇرلى سالادا قىزمەت اتقاراتىن بەلگىلى قازاقستاندىق كومپانيالاردىڭ باسشىلارى قاتىستى.
«2017-جىلى بولاتىن قىسقى ۋنيۆەرسيادا الماتى قالاسىن دامىتۋعا جاسالعان ينۆەستيتسيا بولىپ سانالادى. جالپى، قازىرگى تاڭدا قالانىڭ الەۋمەتتىك-ەكونوميكالىق جاعدايىن جاقسارتۋ، ينۆەستيتسيالىق قولايلى احۋال قالىپتاستىرۋ، شەت ەلدىك تۋريستەر لەگىن ارتتىرۋ ءۇشىن وسىنداي الەمدىك دەڭگەيدەگى سپورتتىق شارالاردى وتكىزىپ تۇرۋ قاجەت. ال الداعى قىسقى ۋنيۆەرسيادا بارىسىندا الماتى قالاسىنا 2000 نان استام سپورتشى، 1000 نان استام تەحنيكالىق ماماندار مەن تورەشىلەر قۇرامى جانە 30 مىڭنان استام تۋريست كەلەيىن دەپ وتىر. وسى ماقساتتا قازىر ماڭىزدى سپورت نىساندارى سالىنىپ جاتىر. سولاردىڭ ىشىندە 3 جانە 12 مىڭ ورىندىق مۇز ارەنالارىن جانە 5 مىڭ ورىندىق اتلەتيكالىق اۋىلدى ايتۋعا بولادى. اتلەتيكالىق اۋىل ۋنيۆەرسيادادان كەيىن ستۋدەنتتەر تۇراتىن جاتاقحاناعا اينالادى»، - دەدى ب. بايبەك.
سونىمەن قاتار قالا باسشىسى 2016-2020-جىلدارعا ارنالعان الماتى قالاسىنىڭ دامۋ باعدارلاماسىنا سايكەس، ونىڭ ينفراقۇرىلىمىنا تىڭ وزگەرىستەر ەنگىزۋ قاجەتتىگىن ايتتى.
«الماتىنىڭ ءاربىر اۋدانى قالانىڭ ورتالىعى ىسپەتتەس بولۋى كەرەك. ياعني، ءاربىر اۋداننىڭ وزىنە جەتكىلىكتى، تولىققاندى ينفراقۇرىلىمى بولۋى قاجەت. ءاربىر اۋداننىڭ تۇرعىنى قالانىڭ ورتالىعىنا شاپقىلاماي، وزىنە قاجەتتى بارلىق قىزمەت ءتۇرىن ءوز اۋدانى اۋماعىندا الۋى ءتيىس. مىنە، وسىلايشا الماتىدا بولاشاقتا ءبىرىڭعاي ءبىر ورتالىق ەمەس، بىرنەشە بەلسەندىلىك ورتالىقتارى قالىپتاساتىن بولادى»، - دەدى ب. بايبەك.
