اۋعانستانداعى قاقتىعىستار مەملەكەتتىك ەمەس، ايماقتىق ماسەلە - م. ا. عاني

استانا. قازاقپارات - اۋعانستان يسلام رەسپۋبليكاسىنىڭ پرەزيدەنتى موحامماد اشراف عاني قازاقستانعا جاساعان رەسمي ساپارى بارىسىندا استاناداعى نازاربايەۆ ۋنيۆەرسيتەتىنىڭ ستۋدەنتتەرى الدىندا ءدارىس وقىدى.

اسكەري قان توگىستى توقتاتۋعا قاتىستى جاسالىپ جاتقان شارالار تۋرالى قويىلعان ساۋالعا جاۋاپ بەرە وتىرىپ، اۋعانستان باسشىسى بۇل قاقتىعىس وشاعى تەك ءبىر ەلدىڭ عانا ەمەس، وسى ايماقتاعى بارشا مەملەكەتتەردىڭ ماسەلەسى ەكەندىگىن قاداپ ايتتى.

«اۋعانستان اسكەري قاقتىعىستى توقتاتۋ جولىندا نە ىستەپ جاتىر؟ ءبىزدىڭ قانىمىز كۇندە توگىلەدى. كۇن سايىن اۋعان ازاماتتارى، مەكتەپكە بارا جاتقان ايەلدەر، سونىڭ ىشىندە قۇران ءتاپسىرىن وقىپ جاتقان قىزدار دا ومىردەن وزادى. پرەزيدەنتتىگىمنىڭ ءار كۇنى سولاي وتەدى. تاڭەرتەڭ مەن جاپا شەككەندەر تۋرالى اقپاراتتى مىندەتتى تۇردە الامىن. مەنىڭ الدىمدا وتە ۇلكەن ماسەلە تۇر. اينالامدا الاي-دۇلەي بولىپ جاتقاندا مەن ءوزىمدى سابىرلىقتا ۇستاۋعا ءماجبۇرمىن»، - دەدى م. ا. عاني مىرزا.

- قازا بولعانداردى قارايتىن بولساق، وندا كىمدەر بار؟! بىزدە قىتايلىقتار، رەسەيلىكتەر، قازاقتار، وزبەكتەر، ارابتار، سولتۇستىك افريكالىقتار، سونىمەن قاتار پاكىستاندىقتار دا بار. بۇل مەملەكەتتىك پروبلەما ەمەس، ايماقتىق ماسەلە ەكەندىگىن اڭعارتادى».

ونىڭ ايتۋىنشا، قازىرگى ۋاقىتتا اۋعان مەملەكەتتىلىگىن ساقتاپ قالۋ باستى مىندەت بولىپ وتىر.

«مەن «سوعىس پرەزيدەنتى» بولعاندى قالامايمىن. ءبىراق مەنىڭ ەڭ نەگىزگى مىندەتىم - ۇلتتىق تاۋەلسىزدىكتى ساقتاپ قالۋ. ەكىنشىدەن، ءبىز ورىن العان جايتقا سىن تاقپايمىز ەشكىمگە، ءبىز بۇل جاعدايدان شىعۋدىڭ جولىن ۇسىنامىز. كۇن سايىن ءبىزدى ءولتىرىپ جاتسا دا، ءبىز وسى بىتپەس شەڭبەردەن شىعۋدىڭ جولدارىن قاراستىرىپ جاتىرمىز. ەڭ وڭايى - بىرەۋگە كىنا ارتۋ. ءبىراق ەڭ دۇرىسى - ماسەلەدەن شىعۋدىڭ ءتيىمدى جولدارىن قاراستىرۋ»، - دەپ اتاپ ءوتتى اۋعانستان پرەزيدەنتى.

ايتا كەتەيىك، موحامماد اشراف عاني بىلتىر اۋعانستان پرەزيدەنتى بولىپ سايلاندى. الەمنىڭ ەڭ بەدەلدى ۋنيۆەرسيتەتتەرىنىڭ قۇرمەتتى پروفەسسورى اتانعان م. ا. عاني ازياداعى 50 ەڭ وزىق ءبىلىمدارلاردىڭ قاتارىنا ەنەدى.

اۆتور: جاسۇلان جولدىبايەۆ