اقتوبە وبلىسى اكىمىنىڭ ورىنباسارى مەن ونىڭ ۇلى ءوز ەركىمەن قىزمەتتەرىنەن كەتتى
بۇل ورەسكەل فاكتى «نۇر وتان» پارتياسى جانىنداعى سىبايلاس جەمقورلىقپەن كۇرەس جونىندەگى قوعامدىق كەڭەستە قارالىپ، مەملەكەتتىك قىزمەتكەردىڭ ەتيكاسىمەن سىيىسپايتىنى بۇكىل رەسپۋبليكا كولەمىنە جاريا بولعان ەدى. اكىم ورىنباسارىنىڭ مىنە ناق وسى سالالاردى باسقاراتىنى كەڭەس مۇشەلەرىنىڭ ەرەكشە رەنىشىن تۋعىزدى. سوندا كەڭەس ءتوراعاسى قايىربەك سۇيمەنوۆ وعان ءوز ەركىمەن قىزمەتىنەن كەتۋدى ۇسىندى.
بۇدان كەيىنىرەك ب ا ق- تا ءوز تۋىستارىنىڭ جوعارىدا اتالعان لاۋازىمدارعا تاعايىندالۋىنا وراي تۇسىندىرمە بەرە كەلىپ، اكىمنىڭ ورىنباسارى ولار ونىڭ تىكەلەي قاراۋىندا ەمەس ەكەنىن، مەملەكەتتىك ورگانداردىڭ ءبىرىنشى باسشىلارىنا باعىناتىنىن ايتقان بولاتىن، سوندىقتان دا ق ر زاڭناماسىنا سايكەس ولاردىڭ لاۋازىمدار اتقارۋىنا شەكتەۋ جوق دەگەن ەدى.
دەگەنمەن، بۇل ماسەلە قوزعالعان ءبىر ايدان كەيىن، دالىرەك ايتساق، 18- قاراشادا اقتوبە وبلىسى اكىمىنىڭ ورىنباسارى سارا نۇرقاتوۆا ءوز ەركىمەن قىزمەتىنەن بوساتۋ جونىندە ءوتىنىش بەردى. بۇدان بۇرىن جاستار ساياساتى ماسەلەلەرى بويىنشا باسقارما باستىعىنىڭ ورىنباسارى قىزمەتىنەن ونىڭ كەلىنى جۇمىسىنان كەتتى. بۇگىن ءوز ەركىمەن ءبىلىم باسقارماسى باستىعىنىڭ ورىنباسارى قىزمەتىنەن بوساتۋ جونىندە ونىڭ ۇلى ءوتىنىش بەردى.
قازاقپارات تىلشىسىنە وبلىس اكىمدىگىنىڭ باسپا ءسوز قىزمەتىنەن حابارلاعانداي، وبلىس اكىمىنىڭ ورىنباسارى سارا نۇرقاتوۆا ازىرگە ءوز مىندەتتەرىن ورىنداۋدى جالعاستىرۋدا. ونىڭ ءوتىنىشى زاڭعا سايكەس ءبىر ايدىڭ ىشىندە قارالماق.
