ماڭگىلىك ەل يدەياسىنا ارنالعان رەسپۋبليكالىق كونفەرەنسيا ءوتتى
بۇل تۋرالى تار م پ ي باسپا ءسوز قىزمەتى حابارلادى.
القالى جيىنعا زيالى قاۋىم وكىلدەرى، عالىمدار، جوعارى وقۋ ورىندارىنىڭ پروفەسسور- وقىتۋشىلار قۇرامى مەن ستۋدەنتتەرى قاتىستى.
«ءبىز تاڭىرگە، تاريحي تاعدىرىمىزعا جۇزدەگەن جىلدىق كۇردەلى كەزەڭدەرى ءۇشىن وكپە ايتپايمىز، بۇگىنگى جانە كەلەشەك ۇرپاققا ەڭ اسىل مۇرا بولىپ قالعان ۇلى وتانىمىز - ەگەمەن قازاقستان ءۇشىن راحمەت ايتامىز! ەندىگى مىندەت - بابالار اماناتىنا ادال بولىپ، ۇلى دالا ەلىندە تاۋەلسىزدىكتى ماڭگى ەتۋ. ماڭگىلىك ەل وتانداستاردىڭ بىرەگەي تاريحي ماقساتى مەن قاھارماندىق ۇرانى دەسەك قاتەلەسپەيمىز. اتالعان يدەيا قازاق ەلىنىڭ عاسىرلار بويى ارمانداعان ماقساتى عانا ەمەس، تاۋەلسىزدىك جولىنداعى جانقيارلىق ەڭبەگى مەن تىنىمسىز شىعارماشىلىعىنىڭ ناتيجەلەرى ارقىلى قول جەتكەن اسۋ»، - دەدى ينستيتۋت رەكتورى داريا قوجامجاروۆا كونفەرەنسيا قاتىسۋشىلارىنا قۇتتىقتىقتاۋ سوزىندە.
عىلىمي- تاجىريبەلىك كونفەرەنسيا بارىسىندا فيلولوگيا عىلىمدارىنىڭ دوكتورى، پروفەسسور مەكەمتاس مىرزاحمەت ۇلى ماڭگىلىك ەل يدەياسىنىڭ تاريحي نەگىزدەرى مەن ءتۇپ- تامىرىنا شولۋ جاسادى. ال، پەداگوگيكا عىلىمدارىنىڭ دوكتورى، پروفەسسور بوتاگۇل تۇرعىنبايەۆا مەن فيلولوگيا عىلىمدارىنىڭ دوكتورى، پروفەسسور ساۋلە ەرجانوۆا جاڭاشىل مۇعالىم دايىنداۋ مەن زياتكەر ۇرپاق تاربيەلەۋدى تارقاتىپ ايتىپ بەردى.
سونىمەن قاتار، كونفەرەنتسيا اياسىندا اباي اتىنداعى قازۇپۋ جانىنداعى جامبىل تانۋ جانە حالىق اقىندارى عىلىمي- زەرتتەۋ ينستيتۋتىنىڭ ديرەكتورى بەكەن ىبىرايىم «اقىندىق شەبەرلىك جانە كوركەمدىك تاجىريبە»، جازۋشى، پۋبليتسيست مارحابات بايعۇت «بۇگىنگى تاڭداعى ادەبيەتتىڭ بەتالىسى» تاقىرىپتارىندا كەلەلى ويلارىمەن بولىسسە، جەرگىلىكتى عالىمدار ءبىلىم بەرۋدەگى زاماناۋي ۇلگىلەر تۋراسىنداعى پىكىرلەرىن ورتاعا سالدى.
كونفەرەنسيا سوڭىندا جاسالعان باياندامالار جانە ايتىلعان ويلار مەن تۇجىرىمدار نەگىزىندە ۇسىنىمدار قابىلداندى.
