رەسەي تەلەارنالارىنىڭ قازاقستاندا تاراۋىنا زاڭمەن توسقاۋىل قويىلدى

الماتى. قازاقپارات - جاڭا جىلدان كەيىن ەلىمىزدە كورسەتىلەتىن شەتەلدىك تەلەارنالار جابىلۋى مۇمكىن.

سەبەبى، دەپۋتاتتار «تەلەراديو حابارلارىن تاراتۋ تۋرالى» زاڭنىڭ №34 -بابىنا وزگەرتۋلەر مەن تولىقتىرۋلار ەنگىزدى. ال، كۇنى كەشە مەملەكەت باسشىسى نۇرسۇلتان نازاربايەۆ اتالعان زاڭعا قول قويدى.

دەمەك، وسى زاڭنىڭ ارقاسىندا شەتەلدىك تەلەارنالاردىڭ ەل اۋماعىندا جارناما تاراتۋىنا بۇدان بىلاي تىيىم سالادى. بۇل ارينە وتاندىق بۇقارالىق اقپارات قۇرالدارىنىڭ ءوسىپ- وركەندەۋىنە ۇلكەن مۇمكىندىك بولىپ وتىر.

شەت ەلدىك تەلەارنالاردىڭ ەل اۋماعىندا تاراتىلۋىنا تيىم سالۋ تۋرالى اڭگىمە بىرنەشە جىلدان بەرى ايتىلىپ كەلەدى. الايدا، بۇعان دەيىن ۇكىمەت اقپاراتتىق قاۋىپسىزدىككە ءجۇردىم- باردىم قاراپ، نازار اۋدارماي كەلگەن بولاتىن. ەندى مىنە، بىرىنەشە جىل بويى كوتەرىلىپ كەلگەن ماسەلە وڭىنان شەشىلدى. ويتكەنى، اتالعان زاڭنىڭ ارقاسىندا وتاندىق ب ا ق- تىڭ باعى اشىلعالى وتىر. ماسەلەن، «31 -ارنانىڭ» باس ديرەكتورى باعدات قوجاحمەتوۆتىڭ ايتۋىنشا جارناماعا تىيىم سالعاننان كەيىن وتاندىق تەلەارنالارعا قوسىمشا 3-4 ميلليارد تەڭگە تۇسەدى. اتالعان قارجىعا ول كەم دەگەندە 1000 ساعات تەلەسەريال تۇسىرۋگە بولادى دەگەن پىكىردە. سالىستىرمالى تۇردە ايتساق، وتكەن جىلى رەسەيدە 1800، ال ەلىمىزدە نەبارى 200 ساعاتتىق تەلەسەريال تۇسىرىلگەن. ال، ەندى اتالعان زاڭنىڭ ارقاسىندا رەسەيدى باسىپ وزباساق تا جاعدايمىزدى جاقسارتىپ الار ەدىك.

الايدا، پرەزيدەنت قول قويعان №34 باپتىڭ پايداسى اناۋ ايتقانداي كەرەمەت بولمايدى دەپ ەسەپتەيتىن ازاماتتار دا بارشىلىق. سولاردىڭ ءبىرى بەلگىلى جۋرناليست سەرىك ەرعالي. ونىڭ ايتۋىنشا، قازاق ءتىلدى بۇقارالىق اقپارات قۇرالدارى ءوزىنىڭ سىباعاسى ءۇشىن كۇرەسپەي شاراسىزدىق كورسەتىپ وتىر.

-  مەنىڭ ويىمشا، ەلىمىزدىڭ بۇقارالىق اقپارات قۇرالدارىنا اتالعان زاڭنىڭ پايداسى بولۋى نەعايبىل. ويتكەنى، شەتەل تەلەارنالارى ەلدەگى جارنامانى نەگىزىنەن ورىس تىلىندە بەرەدى. ال، قازاقشا جارناما نەگىزىنەن اۋدارما ارقىلى جاسالىپ كورەرمەنگە كورسەتىلەدى.

سونداي-اق، گازەت-جۋرنالعا بەرىلەتىن جارنامانىڭ بارلىعى دەرلىك ورىس ءتىلدى جۋرناليستەردىڭ قولىندا. جالپى، جاعدايدىڭ بۇلاي بولۋىنا ەڭ الدىمەن قازاق ب ا ق- تارى كىنالى. ويتكەنى، ولار مەديالىق ورتاداعى ءوز ۇلەستەرىن ساياسي، الەۋمەتتىك جانە قارجىلاي قورعاي الماي وتىر. ەگەر دە زاڭدا ءاربىر جارناما بەرۋشى جارناماسىن مەملەكەتتىك تىلدە بەرۋگە مىندەتتى دەلىنسە نەمەسە سول باپتى قازاق ب ا ق- تارى زاڭعا ەنگىزە السا، پايدا سوندا بولار ەدى. وكىنىشكە قاراي، قازاق بۇقارالىق اقپارات قۇرالدارى لوببي جاساي الماي وتىر. ءتىپتى كەيبىر ب ا ق باسشىلارى لوببي دەگەننىڭ نە ەكەنىن دە بىلمەيدى، -  دەيدى سەرىك ەرعالي.

شىنىندا دا، ەگەر زاڭعا ءاربىر جارناما بەرۋشى جارناماسىن مەملەكەتتىك تىلدە بەرۋگە مىندەتتى دەگەن باپ ەنگىزىلسە، نۇر ۇستىنە نۇر بولار ەدى. الايدا، مۇنداي باپتى ەنگىزۋ قازاق ب ا ق- تارىنىڭ قولىنان كەلمەي وتىر. دەگەنمەن، «تەلەراديو حابارلارىن تاراتۋ تۋرالى» زاڭنىڭ №34 بابىنا وزگەرتۋلەر مەن تولىقتىرۋلار ەنگىزۋدىڭ ءوزى ۇلكەن جاڭالىق. ويتكەنى، اتالعان زاڭنىڭ ارقاسىندا بۇدان بىلاي رەسەيلىك تەلەارنالاردىڭ ەل اۋماعىندا جارناما تاراتۋىنا تىيىم سالادى. ياعني، تەلەحابار تاراتۋشىلار شەتەلدىك، ونىڭ ىشىندە رەسەيلىك تەلەارنالاردى كورسەتكەن كەزدە ونداعى جارنامالاردى قيىپ تاستاۋعا نەمەسە ول ارنالاردى تاراتۋدى توقتاتۋعا ءماجبۇر بولادى. ونداي تەلاراديوحابارلارىن كەسۋ قۇرىلعىلارى ءار ارنا ءۇشىن 1-1,5 ميلليون تەڭگەنى قاجەت ەتەدى. ءبىر وپەراتورعا شامامەن 60 ميلليون تەڭگەدەي شىعىن شىعاتىن كورىنەدى. سوعان قاراعاندا، كابەلدىك حابار تاراتۋشى وپەراتورلار كەلەر جىلى شەتەلدىك ارنالاردى تاراتۋدان جاپپاي باس تارتا باستايتىن سەكىلدى.

بارىمىزگە بەلگىلى ەلىمىزدە قىزمەت كورسەتەتىن شەت ەلدىك تەلەارنانىڭ باسىم بولىگى رەسەيدىڭ باق بولىپ ەسەپتەلەدى. ەگەر رەسەيلىك تەلەارنالار زاڭدا كورسەتىلگەن باپقا قۇلاق اسپاسا ءوز جۇمىسىن قازاق ەلىندە توقتاتادى.

نەگىزى، بيلىك رەسەيلىك تەلەارنالاردىڭ ەل اۋماعىندا تارتاتۋعا قارسى بولىپ وتىر. ويتكەنى بۇعان دەيىن باس پروكۋراتۋرا ۇكىمەتكە ەلىمىزدە تىركەۋدەن وتپەگەن شەت ەلدىك تەلەارنالاردىڭ حابار تاراتۋىنا تىيىم سالۋدى ۇسىنعان بولاتىن. باس پروكۋروردىڭ ورىنباسارى اندرەي كراۆچەنكونىڭ ايتۋىنشا، رەسەيلىك تەلەارنالاردىڭ مەملەكەتتىك ورگانعا تىركەلمەي قىزمەت كورسەتۋى الاڭداتارلىق جاعداي. سوندىقتان دا، ول الداعى ۋاقىتتا ارنايى زاڭ قابىلداپ، ناقتى ارەكەت كەتۋ كەرەك دەگەن بولاتىن.

ەندى مىنە اتالعان زاڭ قابىلدانىپ، ءوز كۇشىنە ەندى. ال، ەندى بيلىك وسى زاڭ تالابىن ۇتىمدى قولدانىپ، ەلىمىزدە اقپاراتتىق ەكسپانسيا جۇرگىزىپ وتىرعان، زاڭ- زاكۇنگە ءجۇردىم- باردىم قارايتىن رەسەيلىك تەلەارنالاردىڭ اياعىنا تۇساۋ سالا السا يگى دەيىك!

سەرىك جولداسباي

«قامشى» سىلتەيدى