جاقسىلىق ۇشكەمپىروۆ جاس بالۋانعا ىرىمداپ جەيدەسىن تارتۋ ەتتى - فوتو
اقتوبەدە 5 - قاراشا كۇنى ەرلەر جانە ايەلدەر كۇرەسىنەن قازاقستان كۋبوگى باستالدى. ءدۇبىرلى دودا 29 جاسىندا ماسكەۋدە وليمپ شىڭىن باعىندىرعان جاقسىلىق ۇشكەمپىروۆ جەڭىسىنىڭ 35 جىلدىعىنا ارنالدى. وعان قازاقستاننىڭ 14 وبلىسى مەن الماتى، استانا قالالارىنىڭ كوماندالارى قاتىستى.
بوز كىلەمدەگى بەلدەسۋدى تاماشالاۋعا جاقسىلىق ۇشكەمپىروۆ ارنايى كەلىپ قاتىستى. داڭقتى پالۋان جاس كەزىندە كيگەن جەيدەسىن كوپشىلىكتىڭ الدىندا اقتوبەلىك مەيرامبەك ايناقۇلوۆقا سىيعا تارتتى. مەيرامبەك - ەكى مارتە الەم چەمپيونى اتانعان جاس پالۋان.
«وسىدان ءبىراز جىل بۇرىن جارىستا كيگەن كيىمىمدى داۋلەت تۇرلىحانوۆقا ۇسىنعان ەدىم. مەنىڭ بەرگەن باتام شىعار، سودان كەيىن بىرنەشە دۇركىن چەمپيون اتاندى. گرەك- ريم كۇرەسىنەن الەم چەمپيونى، ك س ر و جەتى دۇركىن جەڭىمپازى، وليمپيادا ويىندارىنىڭ جەڭىمپازى اتاندى. مىنە، ەكىنشى جەيدەمدى جاس تا بولسا سپورتتىڭ شىڭىن باعىندىرىپ جۇرگەن مەيرامبەك ايناقۇلوۆقا سىيعا تارتامىن. قازاقتىڭ اتىن الەمگە تانىتا تۇسەتىن جەڭىستەرىڭ كوپ بولسىن. بولاشاعى بار بالاسىڭ. مەنىڭ جولىمدى ساعان بەرسىن»، - دەدى جاقسىلىق ۇشكەمپىروۆ.
"Керек. info" تىلشىسىنە مەيرامبەك ايناقۇلوۆ كۇتپەگەن سىيعا قاتتى قۋانىپ ءارى تاڭ قالعانىن ايتتى. ايتۋىنشا، ءالى كۇنگە دەيىن نە ءوڭى، نە ءتۇسى ەكەنىن بىلمەي ءجۇر.
«قازاق سپورتىنىڭ تاريحىندا شوقتىعى بيىك تۇلعا - جاقسىلىق ۇشكەمپىروۆتىڭ جەيدەسىن الامىن دەپ وي ءۇش ۇيىقتاسام دا تۇسىمە كىرمەگەن. بۇل مەن ءۇشىن ۇلكەن جاڭالىق بولدى. سونىمەن قاتار ماعان ءوزىنىڭ ءومىربايانى جازىلعان كىتابىن دا تارتۋ ەتتى. بۇدان بىلاي ەڭ قۇندى نارسەم وسى ەكەۋى بولماق. مۇنداي باقىت كەز كەلگەن پالۋانعا بۇيىرمايدى»، - دەيدى مەيرامبەك ايناقۇلوۆ.
گرەك- ريم كۇرەسىنەن ەكى مارتە الەم چەمپيونى، ەرەسەكتەر اراسىنداعى قازاقستاننىڭ ەكى مارتە چەمپيونى مەيرامبەك ايناقۇلوۆ قاراشا ايىنىڭ ورتاسىنا تامان بەلورۋسسيادا وتەتىن جارىسقا قاتىسادى. دايىندىقتى باستاپ تا كەتكەن. سپورتشى «الەمنىڭ قاي قيىرىندا جۇرسەم دە ۇشكەمپىروۆتىڭ جەيدەسىن جانىمنان ءبىر ەلى تاستامايمىن» دەپ وتىر.
NUR.KZ
