الماتىدا اۋعاندىق ستۋدەنتتىڭ باسقارۋسىز ترامۆايدى توقتاتۋى اۋعانستان پرەزيدەنتىنىڭ كوڭىلىن بوساتتى

استانا. قازاقپارات - بىزدەر ءۇشىن جولدان شىعىپ كەتكەن ترامۆايدى اۋعان ازاماتىنىڭ توقتاتۋى كوڭىل بوساتارلىق جايت بولدى.

بۇگىن بۇل تۋرالى اقوردادا ەلىمىزگە رەسمي ساپارمەن كەلگەن اۋعانستان پرەزيدەنتى موحامماد اشراف گاني ەلباسى نۇرسۇلتان نازاربايەۆپەن كەڭەيتىلگەن قۇرامداعى كەلىسسوزدەردەن كەيىنگى بىرلەسكەن مالىمدەمەدە ايتتى.

«بىزدەر ءۇشىن جولدان شىعىپ كەتكەن ترامۆايدى اۋعان ازاماتىنىڭ توقتاتۋى كوڭىل بوساتارلىق جايت بولدى. بۇل كوڭىلدەن شىعارلىق. ءبىزدىڭ ءوزارا قارىم- قاتىناسىمىز ءدال وسىنداي رۋحتا دامۋى ءتيىس»، - دەپ اتاپ ءوتتى اۋعانستان پرەزيدەنتى.

ەستەرىڭىزگە سالا كەتەيىك، 13 -قازاندا الماتىدا اۋعانستاننان كەلگەن ستۋدەنت باشارات حان يۋسسەفي باسقارۋسىز ترامۆايدى توقتاتىپ، كوپتەگەن ادامنىڭ ءومىرىن ساقتاپ قالعان بولاتىن.

ايتا كەتەرلىگى، 2010 -جىلى مەملەكەت باسشىسىنىڭ تاپسىرماسىمەن قۇنى 50 ميلليون دوللارلىق ءبىلىم بەرۋ باعدارلاماسى ازىرلەنگەن بولاتىن. اتالعان قۇجاتقا سايكەس 2010-2018 -جىلدارى ارالىعىندا مىڭنان استام اۋعان جاسى قازاقستاننىڭ جوعارى وقۋ ورىندارىندا ءبىلىم الادى.

اۆتور: مارلان جيەمباي