ەۋروپانىڭ كارديوحيرۋرگتارى قازاقستانعا وقۋعا كەلىپ جاتىر - يۋ. پيا

استانا. قازاقپارات - استاناداعى ۇلتتىق عىلىمي كارديوحيرۋرگيالىق ورتالىق(جۇرەككە وتا جاسايتىن ورتالىق - رەد.) قازاقستاندىق ماماندار ءۇشىن عانا ەمەس، شەتەلدىكتەر ءۇشىن دە ءبىلىم بازاسىنا اينالۋدا.

بۇل تۋرالى بۇگىن پارلامەنت سەناتىندا وتكەن كەزدەسۋ بارىسىندا ق ر ۇلتتىق كارديولوگيا ورتالىعى باسقارما ءتوراعاسى يۋري پيا ءمالىم ەتتى.

 يۋري پيانىڭ ايتۋىنا قاراعاندا، اعىمداعى جىلدىڭ وزىندە استاناداعى ورتالىقتان 15 ەۋروپا مەملەكەتىنەن كەلگەن ەلۋدەن استام مامان وقىپ شىققان. بۇل رەتتە ورتالىق باسشىسى مەكەمەدە عىلىمي زەرتتەۋ جۇمىستارى بەلسەندى تۇردە جۇزەگە اسىرىلىپ قانا قويماي، وزىق مەديتسينالىق تەحنولوگيانىڭ پراكتيكالىق تاجىريبەلەرىن ەنگىزۋمەن دە اينالىسىپ جاتقانىن اتاپ ءوتتى.

«ءبىزدىڭ ورتالىق حالىقارالىق زەرتتەۋلەرگە دە بەلسەندى قاتىسىپ جاتىر. ماسەلەن، جاقىندا عانا ءبىز سوڭعى بۋىنداعى جاساندى جۇرەكتى پايدالانۋ بويىنشا كوپقىرلى حالىقارالىق زەرتتەۋدى اياقتادىق. سونىمەن قاتار، قازاقستان بۇگىنگى تاڭدا جاساندى جۇرەكتى كلينيكالىق زەرتتەۋدەن تىس قولدانۋدى جالعاستىرىپ كەلە جاتقان الەمدەگى بىردەن- ءبىر مەملەكەت بولىپ وتىر»، - دەدى يۋري پيا.