قازاقستان اۋعانستانعا قارۋ-جاراقپەن كومەك كورسەتەدى - ن. نازاربايەۆ
بۇل تۋرالى بۇگىن اقوردادا قازاقستانعا رەسمي ساپارمەن كەلگەن اۋعانستان يسلام رەسپۋبليكاسىنىڭ پرەزيدەنتى موحامماد اشراف عانيمەن كەلىسسوزدەردەن كەيىنگى بىرلەسكەن مالىمدەمە بارىسىندا ەلباسى نۇرسۇلتان نازاربايەۆ ايتتى.
ق ر پرەزيدەنتىنىڭ اتاپ وتۋىنشە، كەلىسسوزدەر بارىسىندا قازىرگى بولىپ جاتقان احۋال، اۋعانستاننىڭ ىشىندەگى جاعداي، ورتالىق ازيا ەلدەرىنە قانداي قاۋىپ بار، بىرلەسىپ نە ىستەۋ كەرەك، قۇقىق قورعاۋ ورگاندارى، ارنايى ورگاندار بىرلەسىپ لاڭكەستىككە قارسى قانداي شارالار اتقارۋى كەرەك دەگەن ماسەلەلەر ەگجەي- تەگجەيلى تالقىلانعان.
«بۇگىنگى بولاتىن مينيسترلەر اراسىنداعى كەزدەسۋلەردە ولاردىڭ بارلىعى تالقىلاناتىن بولادى»، - دەدى ەلباسى.
سونىمەن قاتار مەملەكەت باسشىسىنىڭ ايتۋىنشا، ەسىرتكى ماسەلەسى دە كەڭىنەن قوزعالعان. قازاقستان ءوز ىشىندە دە ەسىرتكىمەن كۇرەستى جولعا قويعان. دەگەنمەن، ەلىمىز اۋعان تاراپىنان دا ەسىرتكى تارالىمىنا قارسى تۇرۋعا قول ۇشىن بەرەدى دەپ سەنەدى.
«اۋعانستان ازامات سوعىسى ءجۇرىپ، ونىمەن كۇرەسىپ جاتقان ەل. سوندىقتان دا قارۋ- جاراق جاعىنان دا سىزدەرگە كومەك كەرەك. ونى دا ءبىز قاراستىراتىن بولامىز»، - دەدى ن. نازاربايەۆ.
اۆتور: مارلان جيەمباي
