ءتورت جىلدان بەرى تۇسىندە تەك ەلباسىن كورەتىن تۇرعىن مۇنىڭ ءمانىسىن ءتۇس جورۋشىلاردان سۇراپ وتىر
جاسى 50 دەن اسقان جاقسىلىق قۇلقايەۆتىڭ ايتۋىنشا، بۇعان باسىندا ونشا ءمان بەرمەگەن ەكەن. ال مۇنداي جاعداي جيى قايتالانا بەرگەن سوڭ ول ءتۇس جوريتىن جانداردىڭ پىكىرىن بىلگىسى كەلىپتى.
«ءبىزدىڭ بالا كۇنىمىزدە ويماۋىتتا قورجىن ءۇيىمىز بولاتىن. قازىر ول ەسكى ۇيدەن جۇرناق تا قالماعان. ورنىنا ەڭسەلى، ۇلكەن ءۇي تۇرعىزىلعان. نەگە ەكەنى بەلگىسىز، مەنىڭ تۇسىمە ىلعي سول جەردە بولعان قورجىن تام كىرەدى. ىلعي دا تۇسىمدە ونىڭ ىشىندە نۇرسۇلتان كوكەمىز جۇرەدى»، - دەيدى ول.
جاقسىلىق قۇلقايەۆ ءارى قاراي ءتۇسىن جالعاستىرىپ ايتا كەلە:
«بىردە تۇسىمدە الگى قورجىن ءۇيدىڭ ءتور جاعىندا، اپپاق توسەك ۇستىندە باسىن قۇبىلاعا بەرىپ پرەزيدەنتىمىز جاتقانىن كوردىم. ءۇيدىڭ ىشىندە ادام كوپ ەكەن دەيمىن. ويناپ جۇرگەن بالا-شاعادا ەسەپ جوق. «شۋلاماڭدار، كوكەمە تىنىشتىق بەرىڭدەر!» - دەپ الگىلەردى قۋىپ ءجۇرمىن.
ءبىر كەزدە ەلباسى ماعان: «جاقسىلىق، وسى سەن نەمەن اينالىساسىڭ؟» - دەگەن سۇراق قويدى.
مەن وعان: «اسكەرگە بارىپ كەلدىم، سودان بەرى بوسپىن. كولىك جۇرگىزۋگە قۇمارمىن»، - دەپ جاۋاپ بەردىم.
سول كەزدە كوكەم: «وندا مەن ساعان سۋ جاڭا «جەدەل جاردەم» كولىگىن اپەرەيىن. سەن سونداي جۇمىس ىستە»، - دەدى.
وسىلاي اڭگىمەلەسىپ جاتىر ەكەنبىز دەيمىن. ءبىر كەزدە ءۇيدىڭ ىشىنە ءۇش ادام كىرىپ كەلدى دە، ول كىسىنى: «جۇمىسقا باراتىن ۋاقىتىڭىز بولدى»، - دەپ ەرتىپ كەتتى دەيدى جاقسىلىق قۇلقايەۆ.
پرەزيدەنتتى ۇنەمى تۇسىندە كورەتىن ازامات اڭگىمەسىن جالعاي وتىرىپ، ەكىنشى ءتۇسىن دە باياندادى.
«ەكىنشى ءبىر تۇسىمدە، قازىعۇرت تاۋى ەكەن دەيمىن، ءبىر تاۋدىڭ باسىنا ارەڭ دەگەندە ورمەلەپ شىعىپپىن. شىقسام، ەڭ باسىندا ەلباسى ءمارمار تاستىڭ ۇستىنە الدەنەنى جازىپ وتىر ەكەن. مەنى كورىپ: «جاقسىلىق، سەن مۇندا قالاي شىقتىڭ؟ بۇل جەرگە اناۋ-مىناۋ ادام شىعا المايدى عوي؟» - دەپ كۇلىمدەپ قاراپ تۇر دەيدى قۇلقايەۆ.
ءوزىنىڭ ايتۋىنشا، جاقسىلىق ىزماحان ۇلى وسىعان ۇقساس تۇستەردى كۇن سايىن كورەدى ەكەن.
«كەيدە مۇنىڭ سىرىن تۇسىنبەي باسىم قاتادى. بىرەۋلەرگە ايتسام، كەلەكە-مازاق ەتەدى مە دەپ قورقامىن. وزىمشە جاقسىلىققا بالاپ قويامىن. تۋىستارىم مەن دوس-جاراندارىمنان سىر سۋىرتپاقتاپ سۇراستىرسام، ەشقايسىسى تۇسىندە ەلباسىنى كورمەپتى. سوعان قاراعاندا، مۇنىڭ ءوزى تەگىن ەمەس-اۋ دەپ قويامىن. ەگەر ءتۇستى دۇرىس جوري بىلەتىن ادامدار بولسا، پىكىرلەرىن ەستىگىم كەلەدى»، - دەپ ويىن تۇيىندەدى قۇلقايەۆ.
