قازاقستاندىقتار ءۇشىن ءدىني ءبىلىم الۋ ءتارتىبى كۇشەيەدى

استانا. قازاقپارات.  قازاقستان مۇسىلماندارىنىڭ ءدىني باسقارماسى شەت مەملەكەتتەردە ءدىني ءبىلىم الاتىن شاكىرتتەردىڭ ۇستانىم- كوزقاراستارىن قاداعالاۋ ماقساتىندا ارنايى جۇمىس جاساپ جاتقاندىعىن مالىمدەدى.

 بۇگىن بىرنەشە سالا وكىلدەرىمەن ءوتىپ جاتقان دوڭگەلەك ۇستەلدە ەندى ۇمىتكەرلەر ءدىني باسقارما ۇسىنعان وقۋ ورىندارىندا عانا ءبىلىم الۋى ءتيىس ەكەندىگى ايتىلدى.

جانە ءبىلىم الۋشىلار ارنايى سىناق تاپسىرعاننان كەيىن عانا انىقتاماعا قول جەتكىزىپ، شەتەلدە وقۋ مۇمكىندىگىنە يە بولادى. قازاقستان مۇسىلماندار ءدىني باسقارماسى مىسىر، رەسەي، تۇركيا ەلدەرىمەن كەلىسىم جاساسىپتى. ەندى ساۋد ارابياسى مەن مالايزيا باعىتى قاپەرگە الىنادى. قازىرگى تاڭدا 300 دەن استام قازاقستاندىق شەتەلدە ءدىني ءبىلىم الۋدا.

ناۋرىزباي وتپەنوۆ، ق م د ب- نىڭ نايب ءمۇفتيى - بۇگىنگى مىناۋ كەزدەسۋدە ەلىمىزدەگى ارنايى جاۋاپتى مەملەكەتتىك مەكەمەلەرمەن بىرلەسىپ، شەتەلدە وقىپ جاتقان ستۋدەنتتەرىمىزدى باقىلاۋعا الۋ ماقسات بولىپ وتىر. ماقسات -  قولىمىزدان كەلگەنشە ولاردى قولداۋ، ولاردىڭ باعىتىن باقىلاۋ جانە ولاردى دۇرىس باعىتتا ءدارىس الۋىنا قولىمىزدان كەلگەنشە ىقپال جاساۋ، ەلگە ورالعاننان كەيىن وزدەرىنىڭ ماماندىعى بويىنشا ولارعا جۇمىس بەرۋ.

www.khabar.kz