بەكجان تۇرىس ۇلى اكە مەن بالا اراسىنداعى تامىرلانعان تارتىستى ساحناعا الىپ شىقپاق

استانا. قازاقپارات - ق ر ەڭبەك سىڭىرگەن قايراتكەرى، مەملەكەتتىك «دارىن» سىيلىعىنىڭ يەگەرى، م. اۋەزوۆ اتىنداعى اكادەميالىق دراما تەاترىنىڭ اكتەرى بەكجان تۇرىس «ۇلىم ساعان ايتام...» اتتى مونوسپەكتاكل قويماق،

دەپ حابارلادى baistars.kz

اكە باۋىر ەتى بالاسىنىڭ اۋلەت ابىرويىن اسقاقتاتىپ، الەۋمەتتىڭ جايىن ويلار ازامات بولىپ وسكەنىن قالايدى. ال، بالا قاشاندا جاڭاعا ۇمتىلادى. اكە مەن بالا اراسىنداعى تارتىستىڭ تامىرلانۋىن تەك قانا تۇسىنىستىك پەن مەيىرىم عانا ساقتاپ قالادى. كەشەگىگە قارايلاۋدان گورى جاڭانىڭ جەتەگىمەن ءجۇرۋدى ءجون كورەتىن، ءبىلىم مەن بىلىككە كوبىرەك سۇيەنگەن بۇگىنگىنىڭ جاستارىنان يبا مەن يمان قاتار سىڭسە دەپ ويلايدى. تەاتردىڭ تالانتتى ءارتيسى، ساحنا سايىپقىرانى بەكجان تۇرىس ۇلت دەگەندە ۇلاعاتتى ءسوز ايتۋعا ۇمتىلاتىن سەرگەك ويلى ازاماتتاردىڭ ءبىرى رەتىندە، بالاسى ماعجان ەكەۋى مارتەبەلى كورەرمەنىنە ماعىنالى كەش سىيلاماق.

«جەتپىس جەتى كۇن»، «ۇيات بولماسىن»، «ەركەكتىڭ اتى ەركەك» تەلەباعدارلامالارى ارقىلى كوپشىلىككە كەڭىنەن تانىلعان بەكجان تۇرىس بالاسى ماعجانمەن كەشتى ءان مەن جىرمەن كومكەرمەك. سپەكتاكل اۆتورى باقىت بەدەلحان، ال رەجيسسەرى اسحات ماەميروۆ. كەش م. اۋەزوۆ اتىنداعى اكادەميالىق دراما تەاترىندا 6 - جەلتوقسان كۇنى ساعات 17.00-دە باستالادى.