جىل سايىن الەمدە تەمەكى شەگۋ سالدارىنان قانشا ميلليون ادام كوز جۇمادى؟

الماتى. قازاقپارات - بۇگىن الماتىدا حالىقارالىق تەمەكى شەگۋدەن باس تارتۋ كۇنىنە وراي ارنايى باسپا ءسوز ءماسليحاتى بولىپ ءوتتى.

بۇل كۇن الەم بويىنشا جىل سايىن قاراشا ايىنىڭ ءۇشىنشى بەيسەنبىسىندە اتاپ وتىلەتىنى بەلگىلى. ونى العاش رەت ا ق ش- تىڭ ونكولوگيالىق قوعامى 1977-جىلى بەكىتكەن بولاتىن.

«دۇنيەجۇزىلىك دەنساۋلىق ساقتاۋ ۇيىمىنىڭ دەرەگى بويىنشا الەمدە جىلىنا تەمەكى شەگۋدىڭ سالدارىنان 6 ميلليون ادام كوز جۇمادى. ال 600 مىڭنان استام ادام تەمەكى تارتپاسا دا ونىڭ ءتۇتىنىن جۇتىپ، دەنساۋلىعىنا زيان كەلتىرەدى. قازاقستاندا تەمەكىگە قارسى ساياسات «MPOWER» دەپ اتالاتىن شەكتى كونۆەنتسيا اياسىندا جۇزەگە اسىرىلادى.

بۇل شەكتى كونۆەنتسيانى دۇنيەجۇزىلىك دەنساۋلىق ساقتاۋ ۇيىمى ازىرلەگەن. بۇل جەردە باستى ماقسات - تەمەكى تاۋارلارىنا دەگەن سۇرانىستى دا ۇسىنىستى دا ازايتۋ. ەلىمىزدە ۇستىمىزدەگى جىلى «تەمەكى بۇيىمدارىنا سالىناتىن سالىقتىڭ كولەمى ۇلعايتىلسىن!» دەگەن ۇرانمەن 10-19- قاراشا ارالىعىندا ون كۇندىك وتكىزىلدى. وسى ارالىقتا ارنايى توپتار حالىق اراسىندا تەمەكىنىڭ زياندىلىعى تۋرالى ءتۇسىندىرۋ جۇمىستارىن جۇرگىزدى. سونىمەن قاتار، دوڭگەلەك ۇستەلدەر، اشىق ەسىك كۇندەرى ۇيىمداستىرىلدى»، - دەدى ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ سالاماتتى ءومىر سالتىن قالىپتاستىرۋ پروبلەمالارى ۇلتتىق ورتالىعىنىڭ ءبولىم باستىعى ناتاليا سۇلەيمەنوۆا.

ءوز كەزەگىندە الماتى قالالىق سالاماتتى ءومىر سالتىن قالىپتاستىرىۋ ورتالىعىنىڭ دارىگەر- دەنە شىنىقتىرۋ ءبولىمى مەڭگەرۋشىسىنىڭ مىندەتىن اتقارۋشى ىرىسگۇل مەيىرمانوۆا قالادا تەمەكىگە قارسى ورتالىقتار اشىلىپ جاتقانىن حابارلادى.

«قازىر الماتىدا وسىنداي 32 ورتالىق اشىلعان. ولاردا مەدبيكەلەر، پسيحولوگتار جانە الەۋمەتتىك قىزمەتكەرلەر جۇمىس ىستەيدى. سوڭعى 9 ايدىڭ ىشىندە بۇل ورتالىقتارعا بارلىعى 3716 ادام جۇگىندى، ورتالىقتاردىڭ قىزمەتىنە توقتالار بولساق، ولاردا تەمەكىنى تاستايمىن دەگەن ادامدارعا جەكەلەي ارنايى مەديتسينالىق كومەكتەر كورسەتىلەدى»، - دەدى ىرىسگۇل مەيىرمانوۆا.

ايتا كەتەلىك، ورتالىقتارعا جۇگىنگەندەردىڭ اتى-جوندەرى جاريالانبايدى، ياعني اقىل-كەڭەس بەرۋ، مەديتسينالىق كومەك كورسەتۋ جۇمىستارى جاسىرىن جۇرگىزىلەدى.

قازىرگى تاڭدا ەلىمىزدە وسى تەكتەس 84 ورتالىق جۇمىس ىستەپ جاتىر. ولاردىڭ ءبىرقاتارى جەرگىلىكتى اۋرۋحانالار مەن ەمحانالاردىڭ جانىنان اشىلعان. مامانداردىڭ ايتۋىنشا، سوڭعى جىلدارى ەلىمىزدە ەرەسەكتەر اراسىندا تەمەكى تارتۋشىلار سانى ءبىرشاما ازايعاندىعى بايقالادى.

اۆتور: جاپپاربەرگەن ايبوتا