21:22, 19 - قاراشا 2015 | GMT +5
تۇركيا پرەزيدەنتى لاڭكەستىكپەن كۇرەسۋ ءۇشىن مۇسىلمان ەلدەرىنىڭ مايدانىن قۇرۋدى ۇسىندى
استانا. قازاقپارات - تۇركيا پرەزيدەنتى رەجەپ تايىپ ەردوعان ەكسترەميزممەن كۇرەسۋ ءۇشىن مۇسىلمان ەلدەرىنىڭ باسشىلارىن ءبىرىڭعاي مايدان قۇرۋعا شاقىردى، دەپ حابارلادى Gazeta.ru Hurriet تۇرىك گازەتىنە سىلتەمە جاساپ.
«لاڭكەستەردىڭ ارەكەتىنە قارسىمىن جانە بارلىق مۇسىلمان ەلدەرىنىڭ ليدەرلەرىن ولارمەن كۇرەسۋ ءۇشىن ءبىرىڭعاي مايدان قۇرۋعا شاقىرامىن»، - دەدى ەردوعان.
سونداي-اق، تۇركيا پرەزيدەنتى «بارلىق مۇسىلماندار - لاڭكەس» دەگەن مالىمدەمەنى سىنعا الدى. ونىڭ سوزىنە قاراعاندا، كەز كەلگەن ءدىن وكىلى جامان ادام بولۋى مۇمكىن، «يسلام مەملەكەتىن» يسلاممەن بايلانىستىراتىندار قاتەلەسەدى.
وسىعان دەيىن ەردوعان گۋمانيتارلىق جاۋاپكەرشىلىكتەن قۇتىلۋ ءۇشىن ەۋروپاداعى كوشى-قون داعدارىسىن تەرروريزمنىڭ جاھاندىق قاۋپىمەن بايلانىستىرۋعا بولمايتىنىن ايتقان.
