پايعامبار ازىلدەرى - جانىڭا ازىق

استانا. قازاقپارات. تۇيە اسپاننان تۇسپەگەن...

بىردە ءبىر ادام پايعامبارىمىزعا (س. ا. س. ) كەلىپ:

- ۋا، اللانىڭ ەلشىسى (س. ا. س. )، مەنى ءبىر تۇيەگە مىنگىزىڭىز، - دەيدى. پايعامبارىمىز (ساللاللاھۋ 'الەيھي ءۋاسسالام) دا:

- مەن سەنى تۇيەنىڭ تولىنە مىنگىزەمىن، - دەيدى. بۇعان الگى كىسى:

- ۋا، اللانىڭ ەلشىسى (س. ا. س. )، مەن تۇيەنىڭ ءتولىن نە قىلامىن، تۇيەنىڭ تولىنە ءمىنۋشى مە ەدى؟ - دەيدى. سوندا پايعامبارىمىز (ساللاللاھۋ الەيھي ءۋاسسالام):

- تۇيەنى سوندا تۇيەدەن باسقا ءبىر ماقۇلىق تۋعان با؟ - دەيدى (تيرميزي، ءابۋ ءداۋىت). ياعني «قانداي تۇيە بولسىن، مەيلى اتان، مەيلى بوتا بولسىن، ايتەۋىر ءبىر تۇيەنىڭ ءتولى ەمەس پە؟» دەگەندەي، ايتىلۋى ءتيىس قالجىڭنىڭ دا استارىندا تەك اقيقات جاتۋى ءتيىس ەكەنىنە تاماشا ۇلگى كورسەتەدى.

«ەي، ەكى قۇلاقتى!»

پايعامبارىمىزدىڭ ساحابا ءاناستى (رادىياللاھۋ ء'انھۋ) كەيدە «ەي، ءزۇل- ۇزۇنەين!»، ياعني «ەي، ەكى قۇلاقتى!» دەپ شاقىرىپ، قالجىڭداسادى ەكەن. العاشىندا مازاق قىلىپ تۇرعانداي ەستىلگەنىمەن، ادامدا ەكى قۇلاق ەكەنى اقيقات. بۇل دا ورىندى قالجىڭ اقيقاتقا نەگىزدەلۋى ءتيىس ەكەنىنە مىسال.

ءجانناتقا قارتتار كىرمەيدى

بىردە قارتايىپ قالعان ءبىر اجە پايعامبارىمىزعا (س. ا. س. ) كەلىپ:

- ۋا، اللانىڭ ەلشىسى (س. ا. س. )، ءجانناتقا كىرۋىم ءۇشىن دۇعا ەتشى!»، - دەپ سۇرايدى. پايعامبارىمىز دا (س. ا. س. ):

- قارت ايەلدەر ءجانناتقا كىرمەيدى، - دەيدى. پايعامبارىمىزدان مۇنى ەستىگەن قارت انا الگى جەردەن كوڭىلى قۇلازىپ، جىلاپ كەتەدى. پايعامبارىمىز ارتىنشا سوڭىنان ءبىر ساحابانى جىبەرىپ: «وعان ايت قارت ايەلدەر ءجانناتقا كارى كۇيىندە ەمەس، جاس بولىپ كىرەدى»، - دەپ سالەم جولدايدى يمام تيرميزي).

قارىن وتىرىك ايتادى

ءبىر كۇنى پايعامبارىمىزعا (س. ا. س. ) ءبىر كىسى:

باۋىرىمنىڭ قارنى تىرسىلداپ اۋىرىپ جاتىر، - دەپ، نە ىستەۋ كەرەكتىگىن سۇراي كەلەدى. بۇعان پايعامبارىمىز (س. ا. س. ) «بال ءشارباتىن ىشكىز» دەپ كەڭەس بەرەدى. الگى ادام ءبىراز ۋاقىتتان كەيىن قايتا كەلىپ:

بال ءشارباتىن ىشكىزدىم، ءبىراق اۋىرعانى قايتپاي تۇر، - دەيدى. پايعامبارىمىز تاعى دا سول بال ءشارباتىن ىشكىزۋدى كەڭەس ەتەدى. انا ادام ايتقانىن ورىنداپ ءۇشىنشى رەتىندە تاعى دا باۋىرىنىڭ قارنى جازىلماي جاتقانىن ايتادى. پايعامبارىمىز تاعى دا بال شىرىنىن ىشكىزسىن دەپ

قايتارىپ جىبەرەدى. الگى ادام ءتورتىنشى رەتىندە تاعى دا كەلگەنىندە پايعامبارىمىز (ساللاللاھۋ 'الەيھي ءۋاسسالام):

اللا تۋرا سويلەيدى! ول قۇران كارىمدە بالدا شيپا بارىن ايتادى. ال سەنىڭ باۋىرىڭنىڭ قارنى جالعان سويلەيدى. بار دا تاعى دا بال ءشارباتىن ىشكىز» ، - دەپ جىبەرەدى. وسىلايشا تورتىنشىسىندە بارىپ قانا شيپا تابادى. سويتسە، اسقازانداعى اۋرۋ تۋعىزعان دۇنيە كوپ بولعاندىقتان تەك ءتورتىنشى ىشكەندە عانا تولىقتاي تازالانىپ، اۋرۋى باسىلادى.

كۇيەۋىڭ كوزىندە اعى بار بىرەۋ مە ەدى؟

بىردە پايعامبارىمىزدىڭ (س. ا. س. ) بالا باعۋشىسى، ءزايد بين حاريسانىڭ ايەلى ءۇممۇ ايمان اللا ەلشىسىن (س. ا. س. ) قوناققا شاقىرا كەلىپ:

- ۋا، اللانىڭ ەلشىسى (س. ا. س. )، وتاعاسى ءسىزدى ۇيگە قوناققا شاقىرىپ جاتىر! - دەيدى. سوندا پايعامبارىمىز (س. ا. س. ):

- ول قايسى ەدى، الگى كوزىندە اعى بار بىرەۋ مە ەدى؟.. - دەيدى.

- جوق، اللانىڭ ەلشىسى (ساللاللاھۋ 'الەيھي ءۋاسسالام)، كۇيەۋىمنىڭ كوزىندە اق جوق، - دەيدى ءۇممۇ ايمان.

- كوزدەرىندە اعى بار ونىڭ، - دەپ پايعامبارىمىز دا دەس بەرمەيدى. ءۇممۇ ايمان دا:

- اللانىڭ اتىمەن انت ەتەيىن، ونىڭ كوزىندە اق جوق، ۋا، اللانىڭ ەلشىسى! - دەپ قويمايدى. سوندا پايعامبارىمىز (س. ا. س. ):

- كوزىندە اعى جوق ادام بولمايدى، - دەپ، كوزدىڭ اينالاسىنداعى، قاراشىقتىڭ ماڭايىنداعى اقتى مەڭزەگەنىن ايتادى.

ازانشى ازانشىنى قۇرباندىققا شالمايدى

بىردە قۇرباندىققا قوراز شالعىسى كەلگەن حازىرەتى ءبىلال (ر. ا. ) بۇنىڭ دىندە قالاي بولاتىنىن پايعامبارىمىزدان (س. ا. س. ) سۇراي كەلەدى. بۇعان پايعامبارىمىز (س. ا. س. ): «ازانشى ازانشىنى قۇربان ەتە مە ەكەن؟» - دەپ ازىلدەسە وتىرىپ قويعان سۇراعىنا قورازدىڭ قۇرباندىققا شالىنبايتىنىن جەتكىزگەن.

ەندى شىن «كەمە» بولدىڭ

ءبىر ساپاردا ەسىمى «كەمە» ماعىناسىنا كەلەتىن ءسافينا اتتى ساحاباعا كوتەرىپ ءجۇرۋ ءۇشىن ارقاسىنا ءبىراز جۇك بەرەدى. مۇنى كورگەن پايعامبارىمىز (ساللاللاھۋ 'الەيھي ءۋاسسالام): «مىنە، ەندى شىن «كەمە» («ءسافينا» ) بولدىڭ»، - دەپ ازىلدەسەدى.

mazhab.kz