لاڭكەستەر ەۋرووداققا تاعى شابۋىل جاساۋى مۇمكىن - ەۋروپول ديرەكتورى

بريۋسسەل. قازاقپارات - « يسلام مەملەكەتى» لاڭكەستىك توبى ەۋرووداق اۋماعىنا تاعى شابۋىل جاساۋى مۇمكىن.

بۇل تۋرالى ەۋروپول ديرەكتورى روب ۋەينرايت بەيسەنبى كۇنى ەۋروپارلامەنتتە سويلەگەن سوزىندە ءمالىم ەتتى.

« شابۋىلداردىڭ جالعاسى بولۋى مۇمكىن» ، - دەدى روب ۋەينرايت.

ەۋروپول باسشىسىنىڭ سوزىنە قاراعاندا، سوڭعى 10 -جىلدا ەۋروپا ءۇشىن ەڭ ۇلكەن  قاۋىپ توندىرگەن ي م وپەراتسيالارى بولعان.

 پاريجدە ورىن العان لاڭكەستىك وقيعالارعا بايلانىستى ە و كەڭەسىنىڭ ليۋكسەمبۋرگتىك ءتوراعالىعىنىڭ اتىنان ۆيتسە- پرەمەر جانە ليۋكسەمبۋرگتىڭ ىشكى قاۋىپسىزدىك ءمينيسترى ەتەن شنايدەر 20 - قاراشادا بريۋسسەلدە ىشكى ىستەر بويىنشا كەڭەستىڭ كەزەكتەن تىس وتىرىسىن وتكىزۋگە نيەت تانىتتى. جيىندا ەۋرووداقتاعى قاۋىپسىزدىك شارالارىن كۇشەيتۋ جانە قابىلدانعان شارالاردى وتكىزۋدى قامتاماسىز ەتۋ تالقىلانادى.

 ەسكە سالا كەتەيىك، 13 - قاراشادا پاريجدە التى تەراكت جاسالدى. سالدارىنان كەم دەگەندە 129 ادام قازا تاۋىپ، تاعى 350 دەن استامى جاراقاتتاندى. بۇل قىلمىستى « يسلام مەملەكەتى» لاڭكەستىك توبى ءوز موينىنا الدى.

 فرانسيادا توتەنشە جاعداي جاريالاندى.