الماتىلىق ستۋدەنتتەر نۇرسۇلتان نازاربايەۆ وقىعان مەكتەپتە بولدى
ەڭ ۇزدىك وقيتىن ءارى قوعامدىق جۇمىستارعا بەلسەنە ارالاساتىن جەتپىستەن استام ستۋدەنت تاريحي- ولكەتانۋ مۋزەيىن ارالاپ، ونداعى قويىلعان جادىگەرلەردىڭ تاريحىمەن تانىستى. مۋزەي ورنالاسقان بۇل عيماراتتا كەزىندە اباي اتىنداعى مەكتەپ ورنالاسقان بولاتىن. ەلباسى ن. نازاربايەۆ 1957 -جىلى وسى وقۋ ورنىن تامامداعان.
«قازىرگى تاڭدا بۇل قازاقستان پرەزيدەنتىنىڭ بالالىق شاعىنا قاتىستى ساقتالعان ازداعان عيماراتتاردىڭ ءبىرى. 1999 -جىلى وسى مۋزەيدە 465 جادىگەر بولاتىن. قازىر ولاردىڭ سانى 2 مىڭنان استى. ولاردىڭ ىشىندە نۇرسۇلتان ءابىش ۇلىنىڭ ءوزى سىيلاعان قۇندى ەكسپوناتتار دا بار»، - دەدى ەكسكۋرسيا بارىسىندا مۋزەي ديرەكتورى ماريا قوجانوۆا.
سونداي-اق، ستۋدەنتتەر ەلباسىنىڭ سىنىپتاستارىمەن جانە ونىڭ مەكتەپتەگى وقىتۋشىلارىنىڭ ءبىرى سەيىتحان يسايەۆپەن ەستەلىككە سۋرەتكە ءتۇستى. سەيىتحان اقساقال پرەزيدەنتتىڭ جاس ءوسپىرىم شاعىنا قاتىستى قىزىقتى دەرەكتەر كەلتىردى.
«ن. نازاربايەۆ مەكتەپتە جاقسى وقىدى. بارلىق ۇيىرمەلەرگە، سپورتتىق شارالارعا قاتىساتىن. سول كەزدە-اق، جاستاردىڭ كوشباسشىسى بولىپ ءجۇردى. بايسالدى، پاراساتتى بولاتىن. ول شىنىندا دا جاستار ۇلگى تۇتارلىق تۇلعا»، - دەدى سىنىپتاسى رايا سيرازيتدينوۆا.
بۇگىنگى شارانى ۇيىمداستىرۋشىلار - «نۇر وتان» پارتياسىنىڭ «جاس وتان» جاستار قاناتى ۇيىمىنىڭ وكىلدەرى اتاپ وتكەندەي، بۇل مۋزەيگە كەلۋ - ستۋدەنتتەردىڭ جادىندا ءومىر-باقي ساقتالادى.
«الماتىداعى جوعارى وقۋ ورىندارىنا جاستار قازاقستاننىڭ بارلىق وڭىرىنەن كەلىپ وقيدى. ولار ءۇشىن وسى مۋزەيدى كەلىپ ارالاۋ، ەلباسى وتىرعان پارتاعا وتىرۋ، وسىنىڭ بارلىعى ولاردىڭ بويىندا وتانعا دەگەن پاتريوتتىق رۋح قالىپتاستىرادى جانە وقۋعا دەگەن ىنتا-ىقىلاستارىن ارتتىرادى»، - دەدى الماتى قالاسى بويىنشا «جاس وتان» ۇيىمىنىڭ ءتوراعاسى ارمان قالبەكوۆ.
اۆتور: جاپپاربەرگەن ايبوتا
