شەكارادان قۇس ەتى مەن شايانداردى زاڭسىز الىپ وتپەك بولعاندار ۇستالدى

استانا. قازاقپارات - وتكەن تاۋلىك ىشىندە قازاقستاندىق شەكاراشىلار جۇكتەرىن كونتراباندالىق جولمەن شەكارا اسىرماق بولعان قازاقستاندىق ەكى ازاماتتى ۇستادى، دەپ حابارلايدى ق ر ۇ ق ك ش ق باسپا ءسوز قىزمەتىنەن.

اتاپ ايتقاندا، «قاراسۋ- اۆتو» باقىلاۋ- وتكىزۋ بەكەتىندە (قازاق- قىرعىز شەكاراسى) 18 قاراشا كۇنى ساعات 23.40 شاماسىندا 1989 -جىلى تۋىلعان باقتيار ەسىمدى قازاقستان ازاماتى ۇستالدى. ونىڭ «اۋدي-100» كولىگىن قاراۋ كەزىندە جۇك سالعىشىنان سالماعى 50 كەلى بولاتىن ۇيرەك ەتى تابىلدى. جۇرگىزۋشى وعان قاتىستى ىلەستىرمە قۇجاتتارىن كورسەتە المادى. ۇستاۋ ماتەريالدارى جامبىل وبلىسىنىڭ قاراسۋ كەنتىندەگى ۆەتەرينارلىق قىزمەتكە بەرىلدى.

سونداي- اق ەلىمىزدىڭ باتىسىنداعى «شىڭعىرلاۋ تەمىرجول» باقىلاۋ- وتكىزۋ بەكەتىنىڭ (قازاقستان- رەسەي شەكاراسى) شەكارا ناريادى وسى جىلدىڭ 19 - قاراشاسى كۇنى تۇنگى 02.26 شاماسىندا №058 «ورال- استانا» باعىتىنداعى جولاۋشىلار پويىزىنا شەكارالىق باقىلاۋ جۇرگىزدى. باقىلاۋ بارىسىندا «ۆەرا» ەسىمدى 1963 -جىلى تۋىلعان قازاقستان ازاماتشاسىنىڭ سالماعى 30 كەلى بولاتىن ءتىرى شايانداردى جاسىرىن اكەتىپ بارا جاتقانى انىقتالدى. شايانداردىڭ الدىن الا ەسەپتەگەندەگى باعاسى  30000 تەڭگە بولىپ شىقتى. سۋ جاندىكتەرىن زاڭسىز ۇستاعانى ءۇشىن جولاۋشى زاڭ الدىندا جاۋاپ بەرەتىن بولادى.

ۇستاۋ ماتەريالدارى باتىس قازاقستان وبلىسى شىڭعىرلاۋ اۋدانىنىڭ ىشكى ىستەر بولىمىنە بەرىلدى.