نازاربايەۆ زياتكەرلىك مەكتەبىنىڭ وقۋشىلارى اتموسفەرادان ەلەكتر قۋاتىن ءوندىرۋ جوباسىن ويلاپ تاپتى

استانا. قازاقپارات - ورالداعى نازاربايەۆ زياتكەرلىك مەكتەبىنىڭ شاكىرتتەرى اۋا اعىنىنان ەلەكتر قۋاتىن وندىرۋگە بولاتىنىن دالەلدەدى. بولاشاق فيزيكا جانە ماتەماتيكا ماماندارىن دايارلايتىن مەكتەپ شاكىرتتەرىنىڭ وزگە سالادا دا تابىستارى جەتەرلىك.

ماسەلەن، سوڭعى ءۇش جىلدا رەسپۋبليكالىق جانە حالىقارالىق وليمپيادالار مەن بايقاۋلارعا قاتىسقان جۇزگە جۋىق شاكىرت جەڭىمپاز اتاندى. قازىرگى زياتكەرلەر ەل بولاشاعىن قالاي ەلەستەتەدى؟

دەبو وگۋنبي   - اعىلشىن ءتىلى ءپانىنىڭ مۇعالىمى. فيزيكا- ماتەماتيكا ءپانىن تەرەڭدەتىپ وقىتاتىن مەكتەپ ءۇشىن بىلىكتى مامان بارىنەن دە ماڭىزدى. بۇل رەتتە تۇماندى البيوننان مۇحيت اسىپ جەتكەن ۇستازدىڭ شاكىرتتەرىنە ۇيرەتەرى كوپ. «نازاربايەۆ زياتكەرلىك مەكتەبى تۇلەكتەرىنىڭ بولاشاعى جارقىن بولارىنا سەنىمدىمىن. بارشا ارىپتەستەرىم سەكىلدى مەن دە وسى جولدا بار ۋاقىتىمدى سارپ ەتىپ ءجۇرمىن»،  - دەيدى ءوزى.

دەبو وگۋنبي، فيزيكا ءپانىنىڭ مۇعالىمى:

- مەنىڭ ويىمشا، وسىناۋ جارقىن جوبانىڭ اۆتورى پرەزيدەنت نازاربايەۆ - الىستى بولجاي بىلەتىن، دانا كوشباسشى. ولاي دەيتىنىم، بۇل زياتكەرلىك مەكتەپتەردە كەمەل كەلەشەكتىڭ بۇگىنگى ەلشىلەرى دۇنيەتانىمى كەڭ، زەردەلى ۇرپاق بولىپ ءوسىپ كەلەدى. اسىرەسە بۇل جوبانىڭ ەلىمىزدە بىلىكتى كادر الەۋەتىن جاساقتاۋداعى ءرولى ايرىقشا دەپ ويلايمىن.

 ەرنۇر قاليحان   - 10- سىنىپتاعى  وزات وقۋشىلاردىڭ ءبىرى. ءتورت جىل بۇرىن اۋىل مەكتەبىندە ءبىلىم الىپ جۇرگەن زەرەك شاكىرتتىڭ جولى بولىپ، وسىندا قابىلداندى. پرەزيدەنتتىڭ ونەگەلى ءومىر جولىن   ءارقاشان ۇلگى تۇتامىن. ال تاياۋداعى ارمان- ماقساتىم   - نازاربايەۆ ۋنيۆەرسيتەتىنە ءتۇسىپ، ينجەنەر- فيزيك ماماندىعىن مەڭگەرۋ، - دەيدى ءبىلىمپاز ورەن.

 ەرنۇر قاليحان، 10-سىنىپ وقۋشىسى:

 - مەن نازاربايەۆ زياتكەرلىك مەكتەبىندە 7-سىنىپتان بەرى وقىپ كەلەمىن جانە وسى مەكتەپتە وقىعالى بارلىق پاندەردەن تەرەڭ ءبىلىم الدىم. ەلباسىمىز بىزگە ۇلكەن ءۇمىت ارتىپ وتىر. سونىمەن قاتار قازاقستاننىڭ جارقىن بولاشاعىن جاساۋعا بىزدەردە ۇلكەن مۇمكىندىك بار.

بولاشاقتا ەلىنە پايداسىن تيگىزۋدى باستى مۇراتى سانايتىن شاكىرتتەردىڭ سوزدەن ىسكە كوشكەنىنە كۋا بولدىق. ىزدەنۋشى جاستاردىڭ بۇل سالادا جەتكەن جەتىستىكتەرى ساراپشىلار نازارىن اۋدارتىپ وتىر. توعىزىنشى سىنىپتا وقيتىن تالعات پەن مەرحان «يننوۆا 2015» ايماقتىق ونەرتاپقىشتار بايقاۋىندا جەڭىمپاز اتاندى. ولار اتموسفەرادان ەلەكتر قۋاتىن ءوندىرۋ   جوباسىن ويلاپ تاپقان. جۇلدە رەتىندە تابىستالعان قوماقتى قارجىنى جاڭا اپپاراتتاردىڭ قۇرىلىسىنا جۇمساپتى.

تالعات مولداش، 9- سىنىپ وقۋشىسى:

 - ءبىزدىڭ جوبانىڭ ماقساتى - اتموسفەراداعى زاريادتالعان بولشەكتەردەن ەنەرگيا الۋ. اتموسفەرانىڭ تومەنگى قاباتتارىندا اۋا ماسسالارى بار، ولار ءبىر- بىرىمەن ۇيكەلگەن كەزدە توق پايدا بولادى. ياعني مولەكۋلالار سوقتىعىسقاندا يوندار پايدا بولادى. سول يونداردى ءبىز وسى تاجىريبە ارقىلى دالەلدەگەن بولاتىنبىز.

 مىنە، تاۋەلسىز قازاقستاننىڭ بولاشاق يەلەرى وسىنداي، زەردەلى دە زياتكەر، پاراسات پايىمى مول ءارى قولىنان ءىس كەلەتىن ازامات بولىپ قالىپتاسۋى ءتيىس. مەكتەپتەگى بي، ساز، روبوت تەحنيكاسى سەكىلدى ەلۋگە تارتا ۇيىرمە جەتەكشىلەرىنىڭ ورتاق پىكىرى وسىنداي. ءبىلىم نارىمەن سۋسىندايتىن شاكىرتتەر ءۇشىن ەڭ باستىسى تالماي ىزدەنۋ عانا، - دەيدى ۇستازدار.

www.24.kz