جۋرناليستەر اراسىندا سەيداحمەت بەردىقۇلوۆ اتىنداعى بايقاۋ جاريالاندى

استانا. قازاقپارات - قازاقستاننىڭ ب ا ق جۋرناليستەرى اراسىندا سپورت جۋرناليسى، پۋبليتسيست جانە قوعام قايراتكەرى سەيداحمەت بەردىقۇلوۆ اتىنداعى جىل سايىن وتەتىن بايقاۋ باستالدى، دەپ حابارلايدى ق ر مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتىنەن.

سىيلىق جىلىنا ءبىر رەت ءۇش جەڭىمپازعا تاپسىرىلادى. ونىڭ ىشىندە ەكى سىيلىق - مەملەكەتتىك ءتىلدىڭ مارتەبەسىن كوتەرۋ ماقساتىندا قازاق تىلىندە جاريالانعان ماتەريالدارعا، ءبىر سىيلىق - ورىس تىلىندە جاريالانعان ماتەريالدارعا بەلگىلەنگەن.

ۇمىتكەرلەر الەم جانە ازيا چەمپيوناتتارىنا، الەم كۋبوكتارىنا، مارتەبەلى حالىقارالىق جارىستارعا جانە قازاقستان بىرىنشىلىكتەرىنە ارنالعان جاريالانىمدار (وچەركتەر، ماقالالار، تالداۋ، تەلەترانسلياتسيالار، تەلەكوپىرلەر جانە ت. ب.)، قازاقستاندىق ب ا ق- تا بۇقارالىق سپورتتى، بالالار مەن جاسوسپىرىمدەر اراسىنداعى سپورتتى، مۇگەدەكتەر اراسىنداعى جانە ۇلتتىق سپورت تۇرلەرىنەن سپورت ويىندارىن (سپارتاكيادالار، تۋرنيرلەر، ۇلتتىق سپورت تۇرلەرى فەستيۆالى، اۋىل سپورتى) ت. ب. ناسيحاتتاۋ سىندى تاقىرىپتاردى قامتۋى ءتيىس. سونداي-اق ەلىمىزدە دەنە شىنىقتىرۋ جانە سپورت سالاسىنىڭ پروبلەمالارىن كوتەرۋ جانە ونىڭ شەشۋ جولدارىن كورسەتۋ، 2016-جىلعى ريو-دە-جانەيرو قالاسىندا وتەتىن جازعى وليمپيادا جانە پاراليمپيادا ويىندارىنا ارنالعان ليتسەنزيالىق جارىستاردى ناسيحاتتاۋ (تەلە جانە راديو تۇسىرىلىمدەر مەن باعدارلامالار، ينتەرنەت، گازەت جانە جۋرنالداعى ماقالالار مەن وچەركتەر) قۇپتالادى.

بايقاۋعا 2015-جىلى شىققان اۆتورلىق جۇمىستار (كىتاپتار، سپورتتىق ەنتسيكلوپەديالار، ت. ب.) دا قاتىسا الادى.

وتىنىشتەر مەن ماقالالار استانا قالاسى، سىعاناق كوشەسى، 25 ءۇي، 11 قابات، ۇلتتىق شتاتتىق كوماندالار جانە سپورت رەزەرۆى ديرەكتسياسىنىڭ باسپا ءسوز قىزمەتىنە («2015-جىلعى س. بەردىقۇلوۆ اتىنداعى بايقاۋعا» دەگەن بەلگىمەن) قابىلدانادى. قابىلداۋ مەرزىمى - 2015-جىلدىن 5- جەلتوقسانىنا دەيىن.

بايقاۋدىڭ جەڭىمپازدارى «سەيداحمەت بەردىقۇلوۆ اتىنداعى سىيلىقتىڭ لاۋرەاتى» ارنايى توسبەلگىسىمەن ماراپاتتالىپ، ديپلوم مەن اقشالاي سىيلىققا يە بولادى.