الماتىدا جالعان اقشا جاساپ، اينالىمدا ساۋدالاپ كەلگەندەر ۇستالدى - فوتو
ولار 3 اي بويى جالعان كۋپيۋرالاردى الماتى قالاسى مەن وبلىسىندا اينالىمعا سالىپ كەلگەن. بۇل تۋرالى الماتى وبلىسى مەملەكەتتىك كىرىستەر دەپارتامەنتى باسشىسىنىڭ ورىنباسارى داۋلەت اقىلبەكوۆ ايتتى.
نەبارى 21 جاستاعى قازاقستان ازاماتى مەن 21 جانە 23 جاستاعى وزبەكستاننىڭ ەكى ازاماتى ءۇي ىشىنە جاسىرىن سەح اشىپ، استىرتىن جوسپارلارىن ىسكە اسىرىپ كەلگەن. ەكى مىڭ تەڭگەلىك بانكنوتتاردى كومپيۋتەر جانە سكانەر ارقىلى باسىپ، اينالىمعا شىعارىپ وتىرعان.
«جەدەل ىزدەستىرۋ بارىسىندا زاڭسىز اقشا جاساۋشىلاردان بارلىعى 450 مىڭ تەڭگە بولاتىن 2000 تەڭگەلىك كۋپيۋرانىڭ 225 داناسى تابىلعان. سونداي-اق اقشا فورماتى سىزىلعان ا4 ءپىشىندى 11 قاعاز بەن ونى باسىپ شىعارۋعا ارنالعان hp, canon ماركالى كوپ فۋنكتسيونالدى قۇرىلعىلار تاركىلەندى. جالعان كۋپيۋرالار كوبىنەسە باقىلاۋى تومەن ۇساق ساۋدا ورىندارى مەن جانارماي قۇيۋ بەكەتتەرىندە اينالىمعا تۇسكەن»، - دەدى د. اقىلبەكوۆ.
الماتى وبلىسى قاراساي اۋداندىق سوتى ۇشەۋىن ايىپتى دەپ تاۋىپ، ءارقايسىسىن 5 جىلعا باس بوستاندىعىنان ايىردى. سوت ولاردىڭ جەكە مۇلىكتەرىن تاركىلەۋ تۋرالى شەشىم شىعاردى.
