نەگە «قۇنانباي» فيلمى پروكاتقا شىقپاي قالدى؟ - كەسكىن

استانا. قازاقپارات - حالقىمىزدىڭ ۇلى اقىنى، كەمەڭگەر ابايدىڭ اكەسى، تۋرالى «قۇنانباي» كينوكارتيناسى وسى جىلدىڭ كوكتەمىندە پروكاتقا شىعادى دەپ كۇتىلگەن. ءبىراق، بەلگىسىز سەبەپتەرگە بايلانىستى قاراشا ايىنا شەگەرىلدى.

وعان سەبەپ، «قۇنانباي» فيلمىن ەلىمىزدىڭ كينوتەاترلارى كورسەتۋدەن باس تارتىپ وتىرعان كورىنەدى، دەپ حابارلادى baistars.kz.

«كلاسسيكا راديوسىنىڭ جۋرناليسى زيرا ناۋرزبايەۆا فيلمنىڭ رەجيسسەرى ءارى باستى ءرولدى سومداۋشى دوسحان جولجاقسىنوۆقا ماسەلەنىڭ ءمان-جايىن بىلمەككە حابارلاسقان. وعان سەبەپ، «قۇنانباي» فيلمىن ەلىمىزدىڭ كينوتەاترلارى كورسەتۋدەن باس تارتىپ وتىرعان كورىنەدى. فيلمنىڭ كورەرمەنگە جەتۋى ءۇشىن كوپ جەرگە بارىپ، شارشاعاندىعىن جەتكىزگەن. تەك، «ارمان» كينوتەاترى 26-قاراشادا كورسەتەتىن بولىپ كەلىسكەن. باسقا قالالار دا 2-3-جەلتوقسان كۇندەرى كورسەتۋگە ۋادە بەرىپ وتىر. وسىنداي جاعداي ورىن العاندىقتان «قۇنانباي» فيلمى كەشەۋىلدەپ جاتىر»، دەلىنگەن دەرەككوزىندە.

ەسكە سالا كەتەيىك، استانادا 2015-جىلدىڭ 15- مامىرىندا قازمەديا ورتالىعىندا فيلمنىڭ تۇساۋكەسەرى ءوتتى. فيلمدى ەڭ ءبىرىنشى شىعىس قازاقستاندىقتار 13- مامىر كۇنى تاماشالادى. ال پروكاتقا 25- مامىردان باستاپ شىعادى دەپ جوسپارلانعان بولاتىن.

بۇل - دوسحان جولجاقسىنوۆتىڭ ەكىنشى رەجيسسەرلىق جۇمىسى. بۇعان دەيىن «ءبىرجان سال» فيلمىن ءتۇسىرىپ، وندا دا باستى ءرولدى ويناعان بولاتىن. فيلم سەناريىن دوسحان جولجاقسىنوۆ، تالاسبەك اسەمقۇلوۆپەن بىرلەسە وتىرىپ جازعان. فيلم قۇنانبايدىڭ تۋعان جەرىندە، شىعىس قازاقستان وبلىسىندا تۇسىرىلگەن. سول زاماننىڭ تىنىس-تىرشىلىگىن كورسەتۋ ءۇشىن قانشاما دەرەكتى ماتەريالدار جيناقتالىپ، تاريحي قۇندىلىقتار قايتا جاڭعىردى.

تابيعات اياسىنا 150 كيىز ءۇي تىگىلىپ، فيلمدە ءۇش ءجۇزدىڭ جۇيرىگى جارىسقان بايگە، بالۋاندار كۇرەسى، ءانشى-جىرشى، كۇيشىلەردىڭ سايىسى دا كورىنىس تاپقان.