كەلەر جىلدان باستاپ، مەملەكەتتىك قىزمەتكە جاڭادان كەلگەندەر مانساپ جولىن ەڭ تومەنگى لاۋازىمنان باستايتىن بولادى - ب. كامالوۆ
بۇل تۋرالى بۇگىن الماتىدا «قازاقستان رەسپۋبليكاسىنىڭ 2015-2025 - جىلدارعا ارنالعان سىبايلاس جەمقورلىققا قارسى ستراتەگياسىن جۇزەگە اسىرۋ بويىنشا الماتى قالاسىنىڭ المالى اۋدانىندا اتقارىلعان جۇمىستار تۋرالى» تاقىرىبىندا وتكەن كەڭ كولەمدى جينالىس بارىسىندا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ الماتى قالاسى بويىنشا دەپارتامەنتى باسشىسىنىڭ ورىنباسارى باحتيار كامالوۆ مالىمدەدى.
«قازىر قازاقستان رەسپۋبليكاسىنىڭ «مەملەكەتتىك قىزمەت تۋرالى» جاڭا زاڭ جوباسى ق ر پارلامەنتىنىڭ پالاتالارىندا ماقۇلداندى. ەندى، ەلباسى وعان قول قويعان سوڭ، 2016 - جىلدىڭ قاڭتارىنان باستاپ كۇشىنە ەنەدى. جاڭا زاڭ 72 باپتان تۇرادى (اعىمداعى زاڭدا بارلىعى 30 باپ بار). ەندى جاڭا زاڭنىڭ ارقاسىندا ەلىمىزدە سىبايلاس جەمقورلىققا قارسى ءتيىمدى كۇرەس جۇرگىزىلەتىن بولادى.
مىسالى، 2016 - جىلدان باستاپ، مەملەكەتتىك قىزمەتكە جاڭادان كەلگەندەر مەريتوكراتيا تالاپتارىنا سايكەس، وزدەرىنىڭ مانساپ جولىن ەڭ تومەنگى لاۋازىمنان باستايتىن بولادى. ولار بۇل ءۇشىن زاڭنامالاردى بىلەتىندىكتەرى جونىندە ارنايى تەستىلەۋدەن جانە قىزمەتى بويىنشا اڭگىمەلەسۋدەن وتەدى. ال سىناق مەرزىمى «3+3» فورماسىندا بولادى. ياعني، ءۇش اي جانە التى ايدان كەيىن جۇمىستارىنا قاتىستى قورىتىندى جاسالادى»، - دەدى ب. كامالوۆ.
سونىمەن قاتار، ول جاڭا زاڭعا سايكەس قىزمەت بابىمەن باسقا وڭىرگە اۋىسقان اكىمشىلىك- مەملەكەتتىك قىزمەتكەرلەردىڭ وزدەرىنە بەرىلەتىن قىزمەتتىك باسپاناسىن ەندى جەكەشەلەندىرە المايتىندىعىن جەتكىزدى.
«قازىرگى اعىمداعى زاڭ بويىنشا مەملەكەتتىك قىزمەتكەرلەر وزدەرىنىڭ قىزمەتتىك باسپانالارىن جەكەشەلەندىرە الادى. ال جاڭا جىلدان باستاپ، بۇعان تىيىم سالىنادى. سونداي- اق، مۇگەدەك، جۇكتى، قارت اتا- اناسى، مۇگەدەك بالاسى نەمەسە 14 جاسقا دەيىنگى بالاسى بار جالعىز اتا- انا بولىپ سانالاتىن مەملەكەتتىك قىزمەتكەرلەر قىزمەت بابىمەن باسقا جەرگە تەك ەرىكتى تۇردە عانا اۋىسا الادى»، - دەدى ب. كامالوۆ.
بۇدان وزگە باقتيار كامال ۇلى جاڭا زاڭ بويىنشا زەينەتكەرلىك جاسقا جەتكەن مەملەكەتتىك قىزمەتكەرلەردىڭ قىزمەتتەن بوساتىلۋى مۇمكىن ەكەندىگىن ايتتى. الايدا، جۇمىس بەرۋشى ونىمەن ءبىر رەت، 1 جىل مەرزىمگە عانا ەڭبەك كەلىسىم- شارتىن جاساۋعا قۇقىلى. ال اعىمداعى زاڭ بويىنشا بۇل ەڭبەك كەلىسىم- شارتىن جىل سايىن ۇزارتۋعا بولاتىندىعى بەلگىلى. جاڭا جىلدان كەيىن بۇل مۇمكىندىك الىنىپ تاستالادى.
سونداي- اق، جاڭا زاڭعا سايكەس، اسكەر قاتارىنا شاقىرىلعان مەملەكەتتىك قىزمەتكەردىڭ جالاقىسى ساقتالماعانىمەن جۇمىس ورنى ساقتالاتىن بولادى. قازىرگى زاڭدا بۇل قاراستىرىلماعان.
تاعى دا ايتا كەتكەن ءجون، جاڭا جىلدان باستاپ، «ب» كورپۋسىنىڭ كادرلىق رەزەرۆتى قالىپتاستىرۋ ينستيتۋتى تاراتىلادى. ال «ا» كورپۋسىنىڭ كادرلىق رەزەرۆتى قالىپتاستىرۋ ينستيتۋتى ساقتالادى.
اۆتور: جاپپاربەرگەن ايبوتا
