الماتىدا «ءتاپسىر تۇنىعى» كىتابىنىڭ تۇساۋى كەسىلدى - فوتو
وقىرمان قاۋىمعا قازاقستان مۇسىلماندارى ءدىني باسقارماسىنىڭ ءتوراعا ورىنباسارى، نايب ءمۇفتي سەرىكباي قاجى ورازدىڭ «ءتاپسىر تۇنىعى» (29 پارا) كىتابى، ق م د ب رەداكسيالىق القاسى بىرىگىپ شىعارعان «ءدىن - ناسيحات» جانە «جۇما ۋاعىزى» (ءدىن قىزمەتكەرلەرى ءۇشىن وقۋ- ادىستەمەلىك قۇرال) اتتى كىتاپتار كەڭىنەن تانىستىرىلدى. اداسقان اعىمداردىڭ ارباۋىنان ساقتايتىن كىتاپتار قاتىسۋشى قوناقتار مەن ۇلتتىق كىتاپحاناعا سىيعا تارتىلدى.
«قۇراننىڭ ءمان- مازمۇنىنا جەكە مۇسىلمان رەتىندە دە، ءدىن سالاسىنىڭ مامانى رەتىندە دە جاستايىمنان قىزىقتىم. ويتكەنى قۇران - مۇسىلمان ومىرىندە ەرەكشە ورىن الاتىن ەڭ قاستەرلى كىتاپ. سوناۋ 90- جىلدارى تاشكەنت قالاسىندا قاريلار دايىندايتىن مەدرەسەدە وقىپ، قاسيەتتى كالامدى جادىما توقىپ جۇرگەن كەزىمدە دە قۇراندا نە ايتىلعانىن بىلۋگە، وي ەلەگىنە سالۋعا قۇمارتقانىم راس. كەيىنىرەك، قازاقستاندا اشىلعان العاشقى يسلام ينستيتۋتىندا قۇران تاپسىرىنەن ساباق بەرۋ باقىتىنا يە بولدىم. اللانىڭ ءسوزى - قۇراندى حالىققا جەتكىزۋدەن اسقان قىزمەت جوق شىعار دەگەن پىكىر ساناما ابدەن ورناپ الدى. قۇران - قۇلشىلىق، قۇران - عالىم، قۇران - شيپا. ول - مادەنيەت، ول - وركەنيەت، ول - بۇكىل ادامشىلىق قاسيەتتەردىڭ قاينار باستاۋى. قۇران ارقىلى اللا تاعالا ءوز پەندەلەرىن قاراڭعىلىقتان جارىق نۇرعا الىپ شىعادى»، - دەدى وسىعان وراي نايب ءمۇفتي سەرىكباي قاجى وراز.
بۇگىنگى شاراعا ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى، فيلوسوفيا عىلىمدارىنىڭ دوكتورى جاقان مولدابەكوۆ، «پرەزيدەنت جانە حالىق» گازەتىنىڭ باس رەداكتورى مارات توقاشبايەۆ، ءدىن تانۋشى، Ph.D دوكتورى الاۋ ادىلبايەۆ سىندى زيالى قاۋىم وكىلدەرى، عالىمدار جانە يمامدار قاتىسىپ جاڭا كىتاپتار تۋرالى ءوز وي- پىكىرلەرىن ورتاعا سالدى.
ايتا كەتەلىك، ءدىني باسقارما جانىنان جارىق كورگەن كىتاپتار رەسپۋبليكامىزدىڭ بارلىق ايماقتارىنداعى مەشىتتەر مەن مەدرەسەلەرگە، ساۋات اشۋ كۋرستارىندا تەگىن تاراتىلاتىن بولادى.
اۆتور: جاپپاربەرگەن ايبوتا
