كاسىپورىنداردى جاساندى تۇردە قولداۋ ەندى مەملەكەتكە اۋىرعا سوعادى - ك. ءماسىموۆ
«مەملەكەت باسشىسى بىزگە جەكەشەلەندىرۋگە قاتىستى ماسەلەلەردى كۇشەيتىپ، جەدەلدەتۋدى تاپسىردى. كاسىپورىندار جەكە ورتاعا بەرىلىپ، مەملەكەت موينىنا اۋىرتپالىق تۇسىرۋدەن كەتۋى كەرەك. بۇدان بولەك، كاسىپورىنداردىڭ بانكروتتىعى ماسەلەسى دە وزەكتى. بانكروتتىق دەگەن بۇل ادامداردى جۇمىسسىز قالدىرۋ دەگەندى بىلدىرمەۋى شارت، ول كاسىپورىن مەن قىزمەتكەرلەردىڭ جۇمىسىن توقتاتپاي، مەنشىك يەسىن اۋىستىرۋدى، كرەديتورلاردان قورعاۋدى بىلدىرەدى. بۇل بۇدان ءارى رەتتەۋ، مەملەكەتتىك مەنشىكتىڭ تيىمدىلىگىن ارتتىرۋ ماسەلەلەرىن دە قامتيدى» ، - دەپ اتاپ ءوتتى ك. ءماسىموۆ.
«مەملەكەت ءوزىنىڭ رەتتەۋشى قىزمەتىن كۇشەيتىپ، حالىقتىڭ از قامتىلعان توپتارىن قورعاۋدى ءوز موينىنا الادى. نارىقتىق ەكونوميكا جاعدايىندا كاسىپورىندار ءوز كۇنىن ءوزى كورىپ، نارىقتىق جاعدايعا بەيىمدەلۋى كەرەك. جاساندى تۇردە كاسىپورىنداردى مەملەكەت تاراپىنان قولداۋ ەندى اۋىرلاي تۇسەدى» ، - دەدى ۇكىمەت باسشىسى.
بۇدان بولەك، پرەمەر جۇمىسپەن قامتۋ ماسەلەسىنە دە توقتالىپ، بۇعان دەيىنگى باعدارلاما جەتىلدىرىلە تۇسەتىنىن اتاپ ءوتتى.
«ءبىز بۇعان دەيىن 2014-2015 -جىلدارى قابىلداعان شەشىمدەردىڭ بارلىعى 2016-2018 -جىلدارعا ارنالعان داعدارىسقا قارسى باعدارلاماعا شوعىرلاندىرىلادى. بۇگىن ماقۇلداناتىن بيۋدجەت الدىمىزعا جۇكتەلگەن مىندەتتەردى ءتيىمدى شەشۋگە سەپتىگىن تيگىزەدى دەپ ويلايمىن» ، - دەدى ك. ءماسىموۆ.
اۆتور: قانات مامەتقازى ۇلى
