ەلباسى ەلىمىزدەگى داۋلەتتى ادامدارعا ۇندەۋ ارنادى

استانا. قازاقپارات - بۇگىن اقوردادا وتكەن ق ر ۇكىمەتىنىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ ەلىمىزدىڭ قارجى ءمينيسترى باقىت سۇلتانوۆتىڭ قىزمەتىنە كوڭىلى تولمايتىندىعىن اشىق ايتتى.

«جەكەشەلەندىرۋ، زاڭداستىرۋ بيزنەسمەندەر مەن باي ادامداردىڭ جاڭا ساڭلاقتارىنىڭ دامۋ جولى. وسىعان وراي مەن جۋرنالداردا وزدەرىن باي رەتىندە كورسەتىپ جۇرگەن ءبىزدىڭ داۋلەتتى ادامدارعا ۇندەۋ ارنايمىن. وسى جىلدار ىشىندە مەملەكەت سىزدەرگە وسىنداي داۋلەتتى بولۋعا مۇمكىندىك بەردى. سوندىقتان دا مەن ولاردى ەڭ بىرىنشىدەن، زاڭداستىرۋعا، ەكىنشىدەن ءىرى نىسانداردى جەكەشەلەندىرۋگە قاتىسۋعا شاقىرامىن. بىزدەر ءۇشىن جەكەشەلەندىرۋگە قازاقستاندىق كومپانيالاردىڭ قاتىسۋى وتە ماڭىزدى. ءبىرىنشى جەكەشەلەندىرۋدە بىزدە مۇنداي ادامدار بولعان جوق. اقشالىلار بولمادى»، - دەدى ق ر پرەزيدەنتى.

ەلباسىنىڭ اتاپ وتۋىنشە، زاڭداستىرۋ باستاپقىدا مەملەكەتتىك قىزمەتشىلەر، ودان كەيىن بارلىق قازاقستان ازاماتتارى تابىستارى مەن شىعىستارى تۋرالى دەكلاراتسيا تاپسىراتىن كەزەڭنىڭ الدىنداعى سوڭعى شارا بولىپ تابىلادى.

«مەن ەسكەرتكەنمىن، تاعى دا ءبىر ايتقىم كەلەدى: وسى زاڭداستىرۋدان كەيىن ءبىز بۇكىل الەمنەن سالىقتان جاسىرىلعان اقشانى ىزدەۋدى باستايمىز. وزدەرىڭىز دە كورگەن شىعارسىزدار، باس پروكۋرور مەنىمەن بىرگە ءجۇرىپ، ا ق ش- تان باستاپ ەڭ ءىرى مەملەكەتتەرمەن قۇقىقتىق كومەك تۋرالى شارتتارعا قول قويدى. ەكونوميكالىق ىنتىماقتاستىق جانە دامۋ ۇيىمى بارلىق شوتتاردى اشاتىندىعىن، ەشقانداي وففشوردىڭ بولمايتىندىعىن جاريا ەتتى»، - دەدى مەملەكەت باسشىسى.

وسى رەتتە ەلباسى ەلىمىزدىڭ ۇكىمەت باسشىسى كارىم ماسىموۆكە بۇل باعىتتاعى جۇمىستاردى قولعا الۋدى تاپسىردى.

اۆتور: مارلان جيەمباي