ن. نازاربايەۆتىڭ قارجى مينيسترىنە كوڭىلى تولمادى

استانا. قازاقپارات - بۇگىن اقوردادا وتكەن ق ر ۇكىمەتىنىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ ەلىمىزدىڭ قارجى ءمينيسترى باقىت سۇلتانوۆتىڭ قىزمەتىنە كوڭىلى تولمايتىندىعىن اشىق ايتتى.

ەلباسى ءوز سوزىندە بۇگىندە قازاقستاننىڭ دامۋ بانكىن باسقارىپ وتىرعان بولات جامىشەۆ ەلىمىزدىڭ قارجى ءمينيسترى لاۋازىمىن لايىقتى اتقارا الۋى مۇمكىن ەكەندىگىن اتاپ ءوتتى.

«ەگەردە بىزدە دۇرىس قارجى ءمينيسترى، قازىناشى بولسا، وندا ول ءاربىر تيىندى قاداعالاپ وتىرار ەدى. ال سەن بەرە بەرەسىڭ. مەملەكەت قازىناسى ساعان سەنىپ تاپسىرىلدى. سەن مەنىڭ قازىنانى قاداعالايتىن جەكە وكىلىمسىڭ»، - دەدى ەلباسى قارجى ءمينيسترى ب. سۇلتانوۆقا قاراتا.

سونىمەن قاتار ن. نازاربايەۆ قارجى ءمينيسترى مەملەكەت قارجىسىن تىڭعىلىقتى قاداعالاۋى كەرەكتىگىن باسا ايتتى.

«ەڭ دۇرىسى جامىشەۆتى قويۋ كەرەك شىعار. ەشكىممەن سويلەسپەيتىن بولادى. مۇمكىن بىرەۋلەرگە ۇنامايتىن شىعار، ماعان دا كەيدە ۇناماي قالادى. ءبىراق، ول جەتەك سياقتى تىك، بۇل انىق. مەملەكەتتىڭ مۇددەسىن دە قورعايدى»، - دەدى ق ر پرەزيدەنتى.

اۆتور: مارلان جيەمباي