داعدارىس ەكونوميكامىزدى قايتا جاڭعىرتۋعا، جاڭا دەڭگەيگە كوشۋگە مۇمكىندىك بەرەدى - ن. نازاربايەۆ
بۇل تۋرالى بۇگىن اقوردادا وتكەن ق ر ۇكىمەتىنىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ ايتتى.
«ەلمەن بىرگە كورگەن ۇلى توي» دەگەن قازاقتىڭ ءسوزى بار. دۇنيەجۇزىندەگى حالىقتىڭ بارلىعى لاڭكەستىكتى دە، ەكونوميكانىڭ جاعدايىن دا كورىپ وتىر. بىزدە بارلىعى باياعىداي ەمەس. بۇدان وتەمىز. بولىپ جاتقان جاعدايدى جاڭارتۋعا، جاڭا ەكونوميكاعا، جاڭا باستامالارعا، جاڭا ينۆەستيتسيالارعا جول اشاتىن جاعداي دەپ ساناۋ كەرەك. ونى قالاي تابۋ ءبىزدىڭ ماماندىعىمىزعا، بىلگىرلىگىمىزگە بايلانىستى. وسى كۇنى ۇكىمەتتىڭ مۇشەلەرىنىڭ بارلىعى ءبىلىمدى. تىلدەردى بىلەدى، وقىپ كەلگەن، دۇنيەنىڭ بارلىعىن كورگەن. قاعازعا قاراپ، ينتەرنەتكە قاراپ بارلىعىن تۇسىنە الادى، بىلە الادى. جولدى دا تابۋ كەرەك. تاۋىپ جاتقان ەلدەر دە بار. سولاردىڭ دا جولىمەن جۇرۋگە بولادى»، - دەدى ەلباسى.
سونىمەن قاتار مەملەكەت باسشىسى بۇل داعدارىس ەكونوميكامىزدى قايتا جاڭعىرتۋعا، جاڭا دەڭگەيگە كوشۋگە مۇمكىندىك بەرەتىنىن، باسەكەگە قابىلەتتىلىك شارالارىن قابىلداۋ وتە اۋىر قابىلداناتىندىعىن باسا ايتتى.
«كەز كەلگەن رەفورما - باسشىلار ءۇشىن اۋىرتپالىقتى ءىس. ءبىراق باتىل باسشى مۇنان وتەدى. ويتكەنى ونىڭ ناتيجەسى حالىق يگىلىگىنە اينالادى. ەگەر ەشتەڭە ىستەمەسەك، وندا 3,4 جىلدان كەيىن حالىققا اقشا تولەۋدى مۇلدەم دوعاراتىن بولامىز»، - دەدى ق ر پرەزيدەنتى.
اۆتور: مارلان جيەمباي
