ءۇش وبلىستا وتكەن جيىنداردا ورىس ءتىلدى ازاماتتار مەملەكەتتىك ءتىلدى بەلسەندى يگەرۋ تۇرعىسىندا كوپتەگەن ۇسىنىستار ايتتى - د. كوشىم

استانا. قازاقپارات - ءۇش وبلىستا وتكەن جيىندار بارىسىندا ورىسءتىلدى ازاماتتار مەملەكەتتىك ءتىلدى قولدانۋ اياسىن كەڭەيتۋ تۇرعىسىندا كوپتەگەن ۇسىنىستار ايتتى.

بۇل تۋرالى بۇگىن «قازاقستاننىڭ بولاشاعى - قازاق تىلىندە» ورىسءتىلدى ازاماتتار اراسىندا مەملەكەتتىك ءتىلدى ناسيحاتتاۋ جوباسى بويىنشا قورىتىندى بريفينگتە ق ح ا عىلىمي- ساراپشىلىق كەڭەسىنىڭ مۇشەسى، قوعام قايراتكەرى دوس كوشىم ءمالىم ەتتى.

ايتا كەتەيىك، ق ر مادەنيەت جانە سپورت مينيسترلىگى تىلدەردى دامىتۋ جانە قوعامدىق- ساياسي جۇمىس كوميتەتى تاراپىنان ەلىمىزدىڭ 3 وبلىسىندا «قازاقستاننىڭ بولاشاعى - قازاق تىلىندە» اتتى شارالار وتكىزىلدى. وسى جوبا اياسىندا جۇمىس توبى قۇرامىندا بەلگىلى ساياساتتانۋشىلار مەن قوعام قايراتكەرلەرى، جەرگىلىكتى جەرلەردەگى تىلدەردى دامىتۋ جانە ىشكى ساياسات باسقارمالارىنىڭ باسشىلارى بولدى.

«ءبىر ايعا جۋىق ۋاقىت ىشىندە شىعىس قازاقستان، پاۆلودار، قاراعاندى وبلىستارىنداعى قالالار مەن اۋدان ورتالىقتارىندا 39 كەزدەسۋ وتكىزدىك. بۇل باعدارلاما ارنايى ورىسءتىلدى اۋديتورياعا ارنالعان. ماقساتىمىز - ورىسءتىلدى ازاماتتارعا مەملەكەتتىك تىلگە دەگەن پوزيتيۆتىك كوزقاراس قالىپتاستىرۋ. ولارعا قازاقستانداعى مەملەكەتتىك ءتىلدىڭ قازىرگى جاعدايىن تانىستىرۋ، پىكىرلەسۋ، ۇسىنىستارىن تىڭداۋ، ەلىمىزدەگى مەملەكەتتىك ءتىلدىڭ احۋالىنا بىرگە تالداۋ جاساپ، ءتىلدى قولدانۋ اياسىن كەڭەيتۋگە نەگىزدەلگەن ناسيحات باعىتىنداعى جۇمىستار جۇرگىزىلدى»، - دەدى د. كوشىم.

ونىڭ سوزىنە قاراعاندا، اتالعان وبلىستاردا دوڭگەلەك ۇستەل، كەزدەسۋ، بريفينگ تۇرىندە وتكەن شارالارعا 2 مىڭنان استام ازاماتتار قاتىستى.

«مەملەكەت قازاق ءتىلىن ۇيرەتۋگە قولىنان كەلگەن جاعدايدى جاساپ جاتىر. ورتالىقتار اشىلدى، قاجەتتى كىتاپتار شىعارىلىپ جاتىر. وسى ورايدا ءبىز ورىسءتىلدى ازاماتتاردىڭ مەملەكەتتىك ءتىلدى نەلىكتەن باياۋ يگەرىپ جاتقاندىعى تۇرعىسىندا وزدەرىن ويلاندىرۋعا تىرىستىق. ارينە، بالالارىنىڭ بولاشاعى قازاق تىلىنە بايلانىستى ەكەنىن اڭگىمەلەدىك. وسى شارالارداعى قۋانارلىق جاعداي - ورىسءتىلدى ازاماتتار كوپتەگەن ۇسىنىستاردى بىزگە ايتتى. ونىڭ جەكە ەسەپ تۇرىندە شىعارامىز. مەنىڭ وزىمە ۇناعان پىكىردىڭ بىرىنە توقتالاتىن بولسام، ورىسءتىلدى ازاماتتار «مەكتەپ بىتىرگەن ۋاقىتتا بالالاردىڭ بارلىعى قازاق تىلىنەن تەست تاپسىرۋ كەرەكتىگىن جانە ونىڭ بالى ج و و- عا تۇسكەن كەزدە ەسەپتەلىنۋى قاجەت» دەپ وي ءتۇيدى. سونىمەن قاتار بالاباقشالاردىڭ بارلىعى قازاق تىلىندە بولۋى قاجەت ەكەنىن العا تارتتى. ولاردىڭ پايىمىنشا، سول كەزدە جەتكىنشەكتەردىڭ مەكتەپكە دەيىنگى كەزەڭدە قازاق ءتىل بازاسى قالىپتاسادى»، - دەدى قوعام قايراتكەرى.

سونىمەن قاتار د. كوشىم كوپتەگەن جەرلەردە قازاق تىلىندەگى مەكتەپتەرگە وزگە ۇلت وكىلدەرىنىڭ بالالارىن وقۋعا بەرۋى كوبەيىپ كەلە جاتقانىن اتاپ ءوتتى. «تاعى ءبىر ايتا كەتەر جايت، بالالارىن قازاق تىلىندەگى بالاباقشالار مەن مەكتەپكە دەيىنگى ورتالىقتارعا بەرىپ جاتقاندار ەكى- ءۇش ەسەگە كوپ. وسى ورايدا قازاق مەكتەپتەرىنە باراتىن باسقا ۇلت وكىلدەرىنىڭ لەگى ارتادى. بۇل ۇلكەن وزگەرىس»، - دەدى ول.

 بەلگىلى بولعانداي، وسى كەزدەسۋلەر قورىتىندىسى بويىنشا تالدامالى ەسەپ جاسالعان، وندا ءتيىستى ۆەدومستۆولارعا ۇسىنىستار مەن انىقتالامالار قامتىلىپ وتىر.

اۆتور: رۋسلان عابباسوۆ