قازاقستاندىق قىز پاريج اۋەجايىندا مۇسىلمانداردىڭ بولەك تەكسەرىلگەنىن ايتتى

استانا. قازاقپارات - فرانسياداعى تەراكتىلەردەن كەيىن ەلگە ورالعان قازاقستاندىق اۋەجايدا مۇسىلماندار مەن ەۋروپالىقتاردىڭ بولەك تەكسەرىلگەنىن ايتتى، - دەپ حابارلايدى «استانا» تەلەارناسى.

«اۋەجايدا مۇسىلماندار ءتولقۇجات تەكسەرىسىنەن بولەك ءوتتى. تەكسەرىپ شىقتى. نەگە ەكەنى، ەۋروپا ەلدەرىنىڭ ازاماتتارى تەكسەرىستەن بولەك ءوتتى. ال مۇسىلماندار بولەك. ءبىزدى بولەك تەكسەردى. قاتاڭ تەكسەردى، مۇقيات. ۇزاق»، - دەدى اقتاۋ تۇرعىنى ينديرا ايتمۇراتوۆا.

ونىڭ ايتۋىنشا، قايعىلى جاعداي تۋرالى ول ينتەرنەتتەن بىلگەن. «فرانسيادا ءبىر جۋرناليست كەزدەسىپ قالدى. ول قازاقستان ەلشىلىگىنەن بىرەۋ حابارلاستى ما دەپ سۇرادى. وسى ءبىزدى قاتتى قىنجىلتتى، سەبەبى ەلشىلىكتەن ەشكىم حابارلاسىپ، ءبارى دۇرىس پا دەپ سۇراعان جوق. بۇل ۇلكەن مينۋس. كەيبىر تاكسيلەر تەگىن جەتكىزىپ سالدى. اسىرەسە ورتالىقتا. بەس جۇلدىزدى قوناق ۇيدەگىلەر كليەنتتەرىنە قوڭىراۋ شالىپ، ءبارى دۇرىس پا دەپ ءبىلدى»، - دەپ ەسكە الدى ايتمۇراتوۆا.

ەسكە سالا كەتەيىك، 14- قاراشاعا قاراعان ءتۇنى پاريجدە بەلگىسىز بىرەۋلەر ەڭ الدىمەن قالاداعى مەيرامحانالاردىڭ بىرىنە شابۋىل جاسادى. سونىمەن قاتار، فرانسيا-گەرمانيا ماتچى ءوتىپ جاتقان «ستاد دە فرانس» ستاديونىنىڭ ماڭىنان دا جارىلىستىڭ دىبىسى ەستىلدى. لاڭكەستەر «باتاكلان» تەاترىندا ادامداردى كەپىلگە الدى. سوڭعى دەرەك بويىنشا، 129 ادام قازا تاۋىپ، 300 ادام جاراقاتتاندى. جەتى لاڭكەستىڭ كوزى جويىلدى.