ورالدا اقىن ايسۇلۋ قادىربايەۆانىڭ «بارىپ قايت، بالام، اۋىلعا» اتتى شىعارماشىلىق كەشى ءوتتى - فوتو
وسىدان الپىس بەس جىل بۇرىن، 1950 - جىلى 21 - قاراشادا قاراتوبە اۋدانى قوسكول اۋىلىندا كىندىك قانى تامعان ايسۇلۋ قادىربايەۆا 1972 - جىلى اباي اتىنداعى قازاق پەداگوگيكالىق ينستيتۋتىن بىتىرگەننەن كەيىن «جازۋشى» باسپاسىندا قىزمەت ەتتى.
ال 1984-1990 - جىلدارى قازاق راديوسىنىڭ باتىس قازاقستان وبلىسى بويىنشا مەنشىكتى ءتىلشىسى بولسا، «قازاق ءتىلى» قوعامى قۇرىلعان كەزدە ونىڭ وبلىستىق بولىمشەسىنە باسشىلىق ەتتى. بۇل رەتتە س. سەيفۋللين اتىنداعى №11 وبلىستىق مەكتەپ- ينتەرنات كەشەنىندە باستاۋىش قازاق سىنىبىنىڭ جانە قازاق تىلىندە تاربيە بەرەتىن «شولپان» بالاباقشاسىنىڭ اشىلۋىنا ەرەكشە ەڭبەك ءسىڭىردى.
1991 -جىلعى قىركۇيەكتە ورال كازاكتارىنىڭ رەسەي پاتشاسىنا قىزمەت ەتۋىنىڭ 400 جىلدىعىن تويلاپ، ەل ىشىنە ىرىتكى سالماقشى بولعانداردىڭ ءىس- ارەكەتىنە «ازات» ازاماتتىق قوزعالىسىمەن بىرگە باتىل توسقاۋىل قويۋشىلاردىڭ الدىڭعى لەگىندە بولدى. ورال تاريحى ءتورت ءجۇز جىلمەن شەكتەلمەيتىنىن، كەمىندە سەگىز عاسىرعا كەتەتىندىگىن ءوزىنىڭ ءورشىل جىرلارىندا دا كەلتىردى.
بارشا جۇرتقا بەلگىلى «بارىپ قايت، بالام، اۋىلعا» اتتى ولەڭى عانا ەمەس، انا بەينەسىن اسقاقتاتا كوتەرگەن «اق مامام»، سونداي- اق قازاق حالقىنىڭ ءتۇپ- تامىرى تىم ارىدە ەكەندىگىن كورسەتىپ، ەلدى اتا- بابا جولىنان تايماي، يماندىلىقتى تۋ ەتۋگە شاقىرعان «شىڭعىس حان» ، «بابىر»، «وسيەتناما» سىندى تولعاۋ- داستاندار جازعان اقىن «شىڭ- قۇز» اتتى تاڭدامالىسىن دا شىعاردى.
ايسۇلۋ قادىربايەۆانىڭ جاڭا كىتابىنا اق جايىقتىڭ اقىن قىزدارى اقۇشتاپ باقتىگەرەيەۆا مەن شولپان قىدىرنيازوۆا اق جول تىلەسە، شىعارماشىلىق كەشىندە ولەڭ- تولعاۋلارىن اتاقتى ءانشى، قازاقستاننىڭ حالىق ءارتىسى عاريفوللا قۇرمانعاليەۆتىڭ شاكىرتى، الماتىدان ارنايى كەلگەن نابات ويناروۆا ورىنداپ بەردى. اقىن دا ءوز ولەڭ- تولعاۋلارىن جاتقا وقىدى. كەش سوڭىندا «شىڭعىس حان» داستانى بويىنشا كورىنىستىڭ قويىلۋى ءورشىل دە كۇرەسكەرلىك رۋحتى تاعى ءبىر پاش ەتتى.
اقىندى مەرەيتويىمەن ءوڭىر باسشىسىنىڭ اتىنان قۇتتىقتاعان وبلىس اكىمىنىڭ ورىنباسارى باقتيار ماكەن ونىڭ پاتريوتتىق ولەڭدەرى كەيىنگى جاستارعا كۇش بەرەتىنىن ايتتى.
