اۋعانستان پرەزيدەنتى رەسمي ساپارمەن قازاقستانعا كەلەدى
«اپتا باسىنان مەملەكەت باسشىسى ءبىرقاتار كەزدەسۋلەر وتكىزدى، ال بۇگىن «ەكسپو-2017» كورمەسىن وتكىزۋگە دايىندىق بارىسى جونىندەگى كەڭەس ءوتتى. ەلباسىنىڭ الداعى كۇندەرگە جۇمىس كەستەسى قانداي؟» دەگەن ساۋالعا داۋرەن ابايەۆ بىلاي دەپ جاۋاپ بەردى: « بۇگىن ، 18- قاراشادا، نۇرسۇلتان ءابىش ۇلى ۇكىمەتتىڭ كەڭەيتىلگەن وتىرىسىن وتكىزەدى. ءىس-شارا بارىسىندا 2015-جىلدىڭ الەۋمەتتىك-ەكونوميكالىق ارالىق قورىتىندىلارى شىعارىلىپ، الەمدىك ەكونوميكاداعى داعدارىستىق ۇردىستەر ەسكەرىلە وتىرىپ الداعى كەزەڭگە ارنالعان نەگىزگى جوسپارلار قارالاتىن بولادى.
«100 ناقتى قادام» - ۇلت جوسپارىن، سونداي-اق يندۋستريالىق جانە ينفراقۇرىلىمدىق باعدارلامالاردى جۇزەگە اسىرۋ جاعدايى تالقىلانادى دەپ جوسپارلانعان. حالىقتىڭ الەۋمەتتىك ءالسىز توپتارىنا جاڭا جاعدايعا بايلانىستى قولداۋ كورسەتۋ شارالارىنا ەرەكشە كوڭىل بولىنەدى. سونىمەن بىرگە، وتىرىستىڭ كۇن تارتىبىنە ينۆەستيتسيالىق تارتىمدىلىقتى ارتتىرۋ جانە جەكەشەلەندىرۋ جۇمىستارىن ودان ءارى جۇرگىزۋ ماسەلەلەرى شىعارىلاتىن بولادى.
سونداي-اق 20- قاراشا كۇنى اۋعانستان يسلام رەسپۋبليكاسىنىڭ پرەزيدەنتى مۇحاممەد اشراف گاني رەسمي ساپارمەن استاناعا كەلەدى دەپ كۇتىلۋدە. ەكى ەل باسشىلارىنىڭ كەلىسسوزدەرى بارىسىندا ايماقتىق قاۋىپسىزدىكتى قامتاماسىز ەتۋ ماسەلەلەرىنە باستى نازار اۋدارىلادى. وزگە ماسەلەلەرگە توقتالار بولساق، ساۋدا-ەكونوميكالىق، ءبىلىم بەرۋ، كولىك-لوگيستيكالىق سالالارداعى ىنتىماقتاستىقتى اتاپ وتۋگە بولادى» .
