قازاقستاندا ءتورت ادامدى «ساياسي تۇتقىن» دەپ تانىدى

استانا. قازاقپارات - قازاقستاندىق قۇقىق قورعاۋشىلار قازاقستانداعى «ساياسي تۇتقىنداردىڭ» جاڭارتىلعان ءتىزىمىن جاريالادى.

قۇقىق قورعاۋشى باقىتجان تورەعوجينانىڭ Facebook-تە حابارلاۋىنشا، 16- قاراشادا بىرنەشە قۇقىق قورعاۋشى مەن زاڭگەردەن تۇراتىن ساراپشىلار كەڭەسى قازاقستانداعى ساياسي تۇتقىندار قاتارىنا اباقتىدا قاماۋدا وتىرعان ءۇش بەلسەندى - ەرمەك نارىمبايەۆ، سەرىكجان مامبەتالين، بولاتبەك ءبىلالوۆ جانە ءدىني الاۋىزدىقتى قوزدىردى دەگەن ايىپپەن سوتتالعان ساكەن تۇلبايەۆتى قوسقان.

نارىمبايەۆ، مامبەتالين جانە ءبىلالوۆ قازىر تەرگەۋ اباقتىسىندا وتىر. ولارعا قىلمىستىق كودەكستىڭ 174- بابىنىڭ 2- تارماعى بويىنشا («الەۋمەتتىك، ۇلتتىق الاۋىزدىق تۋدىراتىن قاساقانا ارەكەتتەردى قوعامدىق بىرلەستىك جەتەكشىسى بولا وتىرىپ جانە اقپارات قۇرالدارىن پايدالانىپ جاريا تۇردە جاساۋ») ايىپ تاعىلعان.

ساكەن تۇلبايەۆ بيىل شىلدەدە قازاقستاندا تىيىم سالىنعان «تابليعي جاماعات» ءدىني ۇيىمىنا قاتىسى بار جانە «ءدىني ارازدىقتى ءورشىتتى» دەپ تانىلىپ، 4 جىل 8 ايعا سوتتالعان. قۇقىق قورعاۋشىلار بۇل ازاماتتارعا قارسى قوزعالعان ءىستىڭ «ساياسي استارى بار» دەپ سانايدى.

قازاقستاندا العاشقى ساياسي تۇتقىندار ءتىزىمى 2013-جىلى جاسالعان. قۇقىق قورعاۋشىلار ساياسي تۇتقىن دەپ تانىعاندار قاتارىندا وپپوزيتسيالىق ساياساتكەر ۆلاديمير كوزلوۆ، اقىن ءارى ديسسيدەنت ارون اتابەك، «قازاتوم ءوندىرىس» كومپانياسىنىڭ بۇرىنعى باسشىسى مۇحتار جاكىشيەۆ، الماتىداعى قازاق ۇلتتىق تەحنيكالىق ۋنيۆەرسيتەتىنىڭ پروفەسسورى سايات يبرايەۆ، قۇقىق قورعاۋشى ۆاديم كۋرامشين بار.

«ازاتتىق»