ەكى كوماندا اراسىنداعى فۋتبول ويىنى لاڭكەستىك قاۋپىنە بايلانىستى كەيىنگە شەگەرىلدى

بريۋسسەل. قازاقپارات - بەلگيا مەن يسپانيا اراسىنداعى جولداستىق كەزدەسۋ لاڭكەستىكتىڭ ورىن الۋى قاۋپىنىڭ ارتقانىنا بايلانىستى كەيىنگە شەگەرىلدى.

بۇل تۋرالى بەلگيا كورولدىك فۋتبول قاۋىمداستىعىنىڭ رەسمي سايتىندا حابارلاندى.

بەلگيا بيلىگى قاۋىمداستىققا ويىندى كەيىنگە شەگەرۋ تۋرالى ءوتىنىش بىلدىرگەنى اتالىپ ءوتىلدى. بۇعان لاڭكەستىك قاۋپىنىڭ ارتۋى مەن كۇدىكتى تۇلعالار تۋرالى اقپارات سەبەپ بولدى.

«ەكى كوماندا اراسىندا جولداستىق كەزدەسۋ بولمايتىنى تۋرالى كەش حابارلاپ جاتقانىمىز وكىنىشتى، ءارى جانكۇيەرلەردىڭ كوڭىلى قالعانىن تۇسىنەمىز. الايدا جاعدايلاردى ەسكەرە وتىرا، ويىنشىلار مەن جانكۇيەرلەردىڭ باسىن قاۋىپكە تىككىمىز كەلمەيدى»، - دەلىنگەن حابارلامادا.

كورولدىك فۋتبول قاۋىمداستىعىندا بيلەت يەلەرى ءبىر اپتا ىشىندە تولىق نۇسقاۋلار الاتىنىن ايتتى.