كوستيۋم كيسەڭ، بۇعان دەيىن قايدا قالدىڭ؟
بولماسا، دۇنيەنىڭ پارقىن تۇسىنبەگەندىك. باسقا نە دەرسىڭ؟ مەملەكەت تە وتباسى. پرەزيدەنت - اكەسى. مۇندا دا جاڭاعى كورىنىس. ەلباسى تۇرتپەكتەمەيىنشە، ەلباسى بىلاي ەتپەيسىڭدەر مە دەپ ۇرىسپايىنشا، ەلباسى مىنانى قاراشى دەپ ءوزىن ۇلگى ەتپەيىنشە تىرپ ەتپەيدى- اۋ، تىرپ ەتپەيدى.
تاياۋدا عانا ەلباسى ايتقان سوزدەرگە قايتا ورالۋعا تۋرا كەلىپ تۇر. پرەزيدەنت 17 -قىركۇيەك كۇنى اتىراۋدا باتىستاعى وبلىستاردىڭ اكىمدەرىمەن كەزدەسۋى كەزىندە: «مىسالى، مەن قازاقستاندا تىگىلگەن كوستيۋم كيەمىن، اياق كيىمىم دە ءوز ەلىمىزدە تىگىلگەن. ءوزىمىزدىڭ جەڭىل ونەركاسىبىمىزگە وسىلاي جارناما جاسايمىن» دەدى. مۇنى ەلباسى نە ءۇشىن ايتتى؟ ارينە، وتاندىق ءونىمدى كيەيىك، پايدا تاپسا قازاق تاپسىن، بايىسا ءوز بالامىز، قولداساق ءوز پەرزەنتىمىز دەگەنى.
اۋزىنان شىققانى سول ەكەن، شەنەۋنىك بىتكەن ەلىمىزدە شىعاتىن كيىمدەردى ىزدەپ كەتتى. جاپا- تارماعاي كوستيۋمدەرىن جاڭالاي باستادى. ابدەن قىمباتىن كيىپ ۇيرەنىپ قالعان بايشىكەشتەۋلەرىنە ۇنادى ما، ۇنامادى ما، ايتەۋىر دۇرمەككە ءۇن قوسىپ، وسى بۇدان كەيىن تەك قازاقستاندىقتىڭ قولىنان شىققان كيىم كيەمىن دەپ، قاسام ىشۋگە دەيىن بارعانداردى كوردىك. كومەديا. قاراپ وتىرىپ، جۇيكەڭ توزادى. قانىڭ قاينايدى. سول كوستيۋم تىگەتىن، شالبار تىگەتىن فابريكالار تالاي جىلدان بەرى بار. كيسەڭ بۇعان دەيىن قايدا قالدىڭ؟ كىم سەنىڭ قولىڭدى قاقتى؟ وتانشىلدىعىڭ ەلباسى ۇرىسقاندا عانا ويانا ما؟
وسىدان بىرەر جىل بۇرىن ەلباسى شەنەۋنىكتەرگە نەگە وتاندىق كولىكتەرگە مىنبەيسىڭدەر دەپ تاعى رەنجىدى. بۇل كەزدە دە سول. اسەت يسەكەشەۆتەن باستاپ نۇرلان سماعۇلوۆتارعا دەيىن جاپپاي قازاقستاندا شىققان كولىك ىزدەپ كەتتى. ايقايدىڭ بەتى قايتقان سوڭ قايتادان قىمبات كولىكتەرىنە ءمىنىپ العاندارىنا ءشۇبامىز جوق. بىلايشا ايتقاندا، وتانشىلدىقتارى قايتادان ۇيىقتاپ كەتتى.
سول ايقايدان بۇرىن ءماجىلىس دەپۋتاتى - نۇرتاي سابيليانوۆ پارلامەنت اۆتوپاركىنە جاپوندىق 13 - «تويوتا كامري - 50» مەن 2 - «تويوتا لەند كرۋزەر» جانە وتاندىق دەپ ايدار تاعىلعان 15 - «Scoda» كولىگىن ساتىپ الۋ ءۇشىن رەسپۋبليكالىق بيۋدجەتتەن باقانداي 262 ميلليون 480 مىڭ تەڭگە سۇراعانىن ەلدىڭ ءبارى ەستىدى. قانە وتانشىلدىق؟ قانە ۇنەمشىلدىك؟ جوق. ول كەزدە نۇرتايلاردىڭ ميىنىڭ وتانشىلدىققا جاۋاپ بەرەتىن بولىگى ۇيىقتاپ جاتقان. سول باياعى مەرسەدەسىن ءمىنىپ، تويوتاسىن تەبە بەرگىسى كەلگەن. سوسىن نە بولدى؟ سوسىن ەلباسى ەكى اياقتارىن ءبىر ەتىككە تىقتى.
«...بۇلار مەرسەدەسپەن عانا جۇرگىسى كەلەدى. كەرەك بولسا، قالتاسىنان شىعارىپ ساتىپ السىن. دەرەۋ تىيىم سالىڭدار! بۇعان بيۋدجەتتىڭ قاراجاتى جۇمسالماسىن! ءوزىن اۋقاتتى سانايتىندار 200 مىڭ دوللارعا كولىك مىنگىسى كەلسە، ءمىنسىن!.. بىزدە تانكىنى جەڭىل كولىك رەتىندە ساتاتىن بولسا، وعان دا مىنۋگە دايىن. ياعني، ءوز- ءوزىن كورسەتۋ ءۇشىن تەحنيكانى مارتەبە دەپ سانايتىندار بار...»، - دەپ، سۇيەكتەن وتەتىن ءسوز ايتتى. ودان سوڭ نە بولدى دەيسىزدەر عوي؟ ودان سوڭ نۇرتايلاردىڭ ۇيىقتاپ قالعان وتانشىلدىعى مەن ۇنەمشىلدىگى سەلت ەتىپ ويانعانسىدى. سوسىن: «بىزدىكى ۇسىنىس قانا. ول جۇزەگە اسا ما، جوق پا ونى ۇكىمەت شەشەدى. مەنىڭشە، شىعىن شىعارۋدىڭ قاجەتى جوق»، - دەپ، ءوز سوزىنە ءوزى قارسى شىقتى. ەلباسىنىكى دۇرىس ەكەن دەپ، ءوزىن كىنالى ساناعان ادامنىڭ سوزىنە قاراعاندا قورىققان ادامنىڭ سوزىنە كوبىرەك ۇقسايدى.
مۇنىڭ ءبارىن نە ءۇشىن ايتىپ وتىرمىز؟ ەلباسى سونشا نەگە كۇيىپ، پىسەدى؟ قازاق كاسىپكەرلەرىنىڭ بايىعانى، ءىسىنىڭ جۇرگەنى تەك سوعان كەرەك پە؟ نەگە اتقارۋشى بيلىك باس بولىپ، حالىققا ۇلگى بولمايدى؟ يدەيالاردىڭ گەنەراتورى بولارلىق بىرنەشە ادامنىڭ تابىلماعانى ما؟ ءبىر ەلباسى قايدا جەتەدى؟
وتانشىلدىق بىرەۋدىڭ تۇرتپەكتەۋىمەن ويانبايتىنىنا كوزىمىز ابدەن جەتكەن سياقتى. سەبەبى سانانى ابدەن اقشا بيلەگەن قوعامعا وتانشىلدىق دەگەندى ايتساڭ مازاق قىلادى. وزگەنىڭ قاڭسىعىنا اۋىز اشىپ قالعاننىڭ كەسىرى بۇل. ايتپەسە سول شەتەلدىڭ تاۋارى بىزدە دە شىعادى. ساپاسى دا اناۋ ايتقانداي سورلى ەمەس. ەڭ بولماعاندا قىتايدىڭ ارزانقول دۇنيەسىنەن ءتاۋىر. ءبىراق سونى ساتىپ المايمىز. قازىرگىدەي داعدارىس قىسقان تۇستا ءبىر اتانىڭ بالاسىنداي ۇيىمشىل بولماق كەرەك. ءبىر- بىرىمىزگە قولداۋ كورسەتپەي ءىس بولمايدى. سارسەنبايدىڭ دۇكەنىنەن قانت الساڭ، ول كەلىپ سەنەن ەت الادى.
ماقتاسىن جيناي الماي جاتقان كولبايعا قول ۇشىن سوزساڭ، ەرتەڭ پياز شابىعىڭا قول جاردەمىن تيگىزەدى. بۇل اعايىندىقتىڭ، ەلدىكتىڭ كورىنىسى. شىر-پىر بولىپ جۇرگەن پرەزيدەنتتىڭ ىلعي ايتاتىنى دا وسى. ءبىر- بىرىمىزگە سۇيەۋ بولماي ەل بولىپ كەتۋىمىز قيىن. كاسىبى جۇرمەگەن ادام قايىرشى بولادى. قايىرشىسى كوپ ەل، ەل بولا ما؟
داۋرەن ءابدىرامانوۆ،
ult.kz
